قصص مثيرة | احكى موقف حد تعرفه مات على حسن الخاتمة

احكى موقف حد تعرفه مات على حسن الخاتمة

جمعنا مجموعة كبيرة من الشباب من الجنسين عشان نعرف اجابتهم على احكى موقف حد تعرفه مات على حسن الخاتمة وتم تصفية اهم الاجابات ووضعها بين يديك لتساعدك فى موقع تجارب كوم تم تقسيم الاجابات كل تجربة ورأى فى فقرة اى ان كل فقرة تعبر عن راى شخص واحد فقط

سؤال الموضوع :

ياريت كل واحد يقول تجربته أو يقولنا موقف حد تعرفه مات على حسن الخاتمة 

أقرأ ايضا | رد فعلك اي لما جوزك يضربك او يشتمك وما هو عقاب الزوج الذى يضرب زوجته ؟

جدتى ام مامتى طول م بتطلع ف الروح بتتشاهد وبتصلى على سيدنا محمد حقيقى يومها مكنتش متوقعه كدة  حقيقى ف الدنيا وعند وفاتها كانت زكرة ربنا

اخويا الله يرحمه مات وهو بيصلى العشا بعد ماقال التشهد .. وجدى كمان الله يرحمه اتوفى فى الجامع وهو راكع ربنا يرزقنا حسن الخاتمة

ابنه اتوفي في حادث في رمضان لسه حاكي حكايته امبارح هنا في الجروب وكان على وش جواز وصبر بس تعب بالقلب بعدها وفضل بعده 6 شهور مش بيعمل حاجه غير قراءة القرآن والصلاه في يوم قام يصلي فجر الجمعه هو وزوجته وولاده صلى امام بهم بعد ماخلص وقاعد بيختم الصلاه وقع على سجادة الصلاه وكان اول جمعه في ربيع الاول 

حصل موقف بس عن سوء الخاتمة من كذا سنة من شخص على طريق مرسى علم وكان عامل حادثة وكان واضح ان هو بيموت واحد ابن حلال قاله قول الشهادة راح رد وقاله انت مالك يابن ...... وراح سب الدين ومات وعرفنا بعدين ان الله يرحمه كان بيكثر من سب الدين وعاش عليه ومات عليه

أخويا الله يرحمه مات وهو محموم وبعرق الجبين ودموع العين وكانت ليله الجمعة ليله رأس السنة الهجرية واندفن بعد صلاة الجمعة ومشي ف جنازته اكتر من الف شخص حتي الاطفال وكان قبل الوفاة الجو حر جدا لكن يوم وفاته الشمس كانت نور بس مفيش حر والجو مليان نسمات باردة كان الدنيا كلها بتزفه الجنة ان شاء الله الله يرحمك يا حبيبي ويجعل مثواك الجنة يا نور عيني

بابا كان دائم الذكر وخاصة الصلاة على النبى ..عليه افضل الصلاة والسلام .... وفعلا يوم وفاته فضل يصلى على النبى لآخر لحظة فى حياته ... ربنا يرحمه ويجعله فى عليين بحق وجهه الكريم

بابا وهو بيموت قال لماما اقرأى سورة يس وكررتهاله كذا مره وهو بيقول لا اله الا الله محمد رسول الله وكلمه يارب يارب

جدتي قبل ما تموت ما كانتش بقول غير رضيت بالله ربا وبالاسلام دينا وبمحمد صلي الله عليه وسلم نبيا ورسولا

جدي الله يرحمه كان خلاص في سكرات الموت وكنا مشغالين قران جنبه وكانت سوره مريم بصوت المنشاوي واول ما السوره خلصت نطق الشهاده ومات

ابويا اذن للفجر واقام الصلاة وهو في السكرات و اخر كلمة قالها لاختي وهو بيطلع في الروح اقرأيلي قرآن ..رحمه الله عاش عليه ومات عليه

خالي توفي وهو بيصلي وكان راجع من العمرة قبلها بفترة بسيطه الله يرحمه ويرحم موتانا جميعا

بابا اتوفي وكان اخر عمل ليه صدقة اخرجها لعاملة المستشفي واتوفي بعدها بدقايق

جدتي ام والدي رحمهما الله ماتت ساجدة في صلاة الظهر وكانت م اطيب من رايت ولسانه دائما ذاكر لله تحب كل الناس تدعو للكل تحل مشاكل الجميع بكل هدوء  تحملت كثيرا في حياتها مكنتش بتعرف تقرا وتكتب لكن كان عندها اخلاص لله ف كل حاجة تعملها وعلمت والدي الله يرحمه واخوه واخته يحبوا بعض جدا ويخافوا ع بعض

مرات خالى الله يرحمه متعوده تصوم اتنيين وخميس صامت الاثنيين وفطرت وماتت الفجر وهيا بتولد 

خالى مات اول يوم رمضان وهوا ساجد بصلاة الظهر بالمسجد اللهم ارزقنا احسن الخاتمة

كان فى حد بلدنا مات رمضان اللى فات صلاة الفجر و روح البيت واتوفى بعدها ربنا يرحمه

اَْبويِاَْ اَْلّلهً يِرحًمٌهً كنت أنا وهو مسافرين للشغل كنا ف 15 رمضان لما وصلنا الموقف عشان نركب ونروح العصر إذن انا كنت صغير ساعتها ف قالي خليك قاعد هنا جمب الموقف وخلي معاك الشنط هروح أصلي العصر واجيلك المهم صلي وخلص ولقيتو جاي قالي يلا نركب واحنا ماشيين ف الطريق طلع السبحه وقعد يسبح بيها وبعد كده عملنا حادثه واتوفا وانا الحمد لله شويه كسور بس الله يرحمه 

جدى مات وهو ساجد فى صلاة الفجر فى المسجد ..كانت صلاة الفجر هتفوته اتوضي وجرى عالجامع جتله سكته قلبيه وهو ساجد

وجدت مامتى صلت وقبل متقوم اتاوبت وطلعت روحها بكل هدوء مع المتاوبه .

جدتي ماتت وهيه بتسبح لربنا وكان وشها بيضحك وجميله وكانت دايما طول وقتها بتصلي وتسبح ربنا يرحمها ويرحمنا جميعا

والدى كان بياكل ولاقيناه كأنه اتفاجئ برؤية حد وترك الاكل وفضل يقول لا اله الا الله كذا مرة حتى طلوع الروح والموضوع كله لم يستغرق دقايق...رحمة الله عليه

امي الله يرحمها اتوضت و صلت الضحي و اتوفت بمايه الوضوء اتصلي عليها الضهر و كميه بشر غير طبيعيه صلت عليها

لسها من يومين واحد كان بيصلي الفجر بعد كده روح البيت نام لحد الساعه 8 الصبح وصحي رايح يذور بنت اختي عامله عمليه وتوفي ف الطريق هو وصايم

ابويا الله يرحمه صلى العشا ورجع البيت مات فى لمح البصر

قريب من البيت عندنا اول يوم رمضان قاعد قبل المغرب انكفى عل المصحف وهو بيقرا قرأن بيعدلوه لاقوه مات ..

جدي الله يرحمه كان ديما بيصلي الفجر حاضر ويرجع البيت يفطر ويطلع علي الزرع بتاعه (الغيط) وفي يوم ٢٤-من شهر فبراير اتوافي في الزرع ده بعد ما صلاه الفجر

والدى الله يرحمه توفى يوم 24/4/2015 من داخل المسجد يوم الجمعة بعد ان صلي ركعتين تحية المسجد توفاه الله بعدها بثوانى وكان خطيب المسجد يقرأ الخطبة

قبلها يوم الخميس كان متصل بالطربي وقاله حضر المايه علشان ننضف الحوش ويسقو الزرع كان قبل منها بعافيه شويا ويوم الجمعة الطربي اتصل عليه الصبح علشان يأكد على والدى انه جاى والدى الله يرحمه قاله هصلي الجمعة وهاجى علطول مش هتأخر عليك والحمد لله ربنا مأمرش انه يروح الطرب الا على ضهره واحنا بندور علي مفاتيح الطرب مش لاقينها وكانت المفجاءه ان مفاتيح الطرب فى جيب الجلبيه 

بابا كان دايما مع ربنا عبادات و ذكر و صلاه و قرآن و الحمدلله كانت خواتم اعماله اتوفى ف رمضان و سجادته و مصحفه مفتوحين ف مكانه و آمم بالناس ف المسجد يومها و كان عارف كان مكلم الراجل بتاع القبر قبلها بكام يوم قاله جهزه و ده مش اى حد طبعا.. فى الجنه ان شاء الله يا حبيبى💔 هوا و ابو صحابى و جدتى الله ينور قبورهم كان شكلهم متطمن اوى و مرتااح و وشوشهم بتنور

ابويه عليه رحمه الله مات ليله 27رمضان وهو في طريقه للحرم لختم القران كان في العمرة وادفن في البقيع في حادثه وكان اكثر دعاءه اللهم لا تحرمنا مؤانسته في الدنيا والاخرة ولما مات قال دي اللي كنت بتمناها وادفن في نفس الليله ومن 7سنين اخويا مات ليله 21رمضان واخويا الكبير كمان مات قبل عيد الاضحي بيومين مات مبطون و نحسبهم عند الله من الشهداء ربنا يرحمهم جميعااااا

جدتي الله يرحمها ماتت اول جمعه ف رمضان وكانت،موصيه ان يتصلي،عليها الجمعه وفعلا حصل كده وكان بشر كتير بيصلوا بابا لما شاف الموقف ده دعا ان يتصلي عليه زيها وفعلا بعد كام سنه اتوفي في رمضان اول جمعه ساع صلاه الجمعه واتصلي عليه العصر ودفن قبل المغرب وكان صايم الله يرحمه

جد أمي مات وهوة بيصلي ظهر الجمعة إمام وإبنه مات وهوة إمام لصلاة الفجر وبنته ماتت بعد ماخلصت ركعتين قيام الليل ربنا يرزقنا حسن الخاتمه

أبى الله رحمة الله عليه ميت على احرامه كان بيحج واتدفن هناك كما تمنى رحمه الله رحمه واسعه أن شاء الله ربنا تقبل منه وطهره فى الفردوس الأعلى أن شاء الله 

اخويا كان تعبان في الستشفي وهو في ليله النص من شعبان ومات فجر الجمعه واتصلي عليه صلاه الجمعه وادفن في نهار الجمعه وكان اخر كلامه وهو في لا اله الا الله

جدي كان مرتبط بالمسجد ومتعلق بيه بشكل خيالي كان بياذن وبيصلي الفجر ولايحب القيل والقال ، في لحظات احتضاره اذن احد الاوقات فطلب من الموجودين انه يصلي قاموا علي وضوءه ومسكوه وهو بيصلي خلص الصلاه وانتقل الي جوار ربه يومها امام المسجد ذكره بخطبه الجمعه فقال لقد فرت حمامه المسجد

جار لي توفي من كام شهر وكان عمره تجاوز 70 وكان بار بأولاده وزوجته مريضه منذ 20 سنه وكان بيخدمها ويغسل ويطبخ وينضف .. توفي في المسجد بعد أداءه صلاه العصر وكان في ايده المصحف وجدوه مفتوح علي صوره الملك

غسلت جاري الله يرحمه الحاج ابو شوكت كان سبابته اليمني واخده وضعية التشهد وكل مانفتح ايده للغسل يقبضها تاني علي وضعية التشهد.. الله يرحمه 

وغسلت جدي الله يرحمه راجل كبير ف السن مزارع الشمس كانت مخليه لونه قمحي اول ماحطيناه ع الغسل ابتسم ابتسامه لدجة ان عينه بان عليها الابتسامه وهوا مغمض ولونه بقي ابيض وكأنه ماشفش شمس فحياته ‘ كل اللي شاهدوه باسوه وفضلو يقولو اللهم صلي ع النبي الله اكبر من حلاوة اللي شافوه 

بنت خالتى توفت ساعة أذان المغرب بالظبط قالت الشهادة و المغرب قال الله أكبر. توفت و هى صايمة ليلة الجمعة و فى العشر الأواخر من رمضان.ربنا يرزقها الجنة بلا حساب و لا سابق عذاب و يرزقنا حسن الختام

بابا الله يرحمه مات رمضان اللي فات يوم 26 رمضان وكان سبابته اليمين واخده شكل التشهد واتصلي عليه في صلاة العشا والمسجد كان كبيررررر فيه مئات الناس صلت عليه ودعت له اتدفن ليلة 27 رمضان اتدفن وروحي راحت معاه والله الضهر والسند والامان راحو الله يرحمه ويغفر له يارب 

جدي مات وهو كان لسه مصلي قيام الليل ورايح يتوضأ للفجر.. مات وعلي وجهه ماء الوضوء ..

جدي الله يرحمه كان إمام في جامع واتوفى من ١١ سنه اول يوم العيد الكبير فضل يقول لبيك اللهم لبيك لبيك لا شريك لك لبيك ماما استغربت لأنه تعب قبلها بتلات ايام بس ومكنش بيتكلم من التعب قالتله ايه يا بابا انت كويس ابتسملها وفضل يقول لبيك اللهم لبيك لبيك لا شريك لك لبيك ويشاور بايده كأنه مسافر راح ودا وشه ناحية القبله ورفع صوباعه اليمين وقال اشهد ان لا اله الا الله واشهد أن محمد رسول الله 💔💔 ربنا يحسن خاتمتنا جميعا بس لحد لما اموت مش هنسا الموقف ده لأنه حصل قدام عيني ومش عاوز يروح من قدامها

ابويا مات وهو بيتشاهد وبيقولي انا هموت دلوقتي اهوه وبيبتسملي وقالي خالي بالك من نفسك وقعد ينصحني وبتقولي انا روحي طالعه من رجلي اهيه انا حاسس بيها خلاص يا جماعه انا ماشي واتشاهد وخلاص علي كده 

امي الله يرحمها توفت السنه ال فاتت فجر الجمعه صايمه تالت يوم من رجب بعد مصلت الفجر برفع راسها وانا منهاره وبحضنها لقيت مصحف وسبحه ربنا يحسن خاتمتنا يارب

واحد صلى الفجر واتصل بكل عياله عشان يفطروا معاه تانى يوم وصحى تانى يوم صلى ومسك قلبه ومات ف ليله النصف من رمضان

بابايا مات وهو ف المستشفي كان تعبان ورجله مش بتتحرك وقبل مايموت بالليل مشي و قال لااخويا احلقي واستحمي واتوضي وصلي الفجر ومات بعدها بساعتين . الله يرحمه مات يوم 6 ذو الحجة

ابي اخر كلام كان بيقولو وهوا بيطلع في الروح اللهم اني احببت لقائك فاأحب اليوم لقائ... اللهم اغفرله وارحمه

الشيخ اللى كان بيحفظنا قران فى المسجد الله يرحمه توفى وهو بيصلى بينا فى صلاة الفجر مات وهو ساجد اللهم اختم لنا بخير

الله يرحم كل أموات المسلمين ودى كلها قصص بشره خير ان شاء الله يكونو من أهل الجنة من عاش على شى مات عليه الموت على حسن الخاتمة أجمل شى فى الدنيا من بعدها راحه إلى الأبد خد العبره واستعد للحظة دى محدش عارف امتى هايموت

ابويا مات بعد م اتشاهد خمس مرات وطلب من ربنا الرحمة والمغفرة وكان بيسمع القرآن جنبه شغال ويقول الله الله وابتسم ابتسامة جميلة وتوفى واندفن ليلة الجمعة ...الله يرحمه ويغفر له وامى كمان رحمة الله عليها

عمي الله يرحمه مات ليله 27رمضان قبل المغرب بساعه وكان صايم وجوز خالتي برضو مات وهو بيصلي وكان ف رمضان الله يرحمهم ويرحم موتانا ويرزقنا الفردوس الاعلي دون حساب ولا سابق عذاب

عمي امام مسجد و كانو بيصلو صلاة الجنازة على صديق ليه و بعد ما خلصو قرأ سورة ياسين و اتوفى جمب قبر صديقه ، الله يرحمهم يارب

طبيبة اعرفها وهي بتسمع القرٱن في المسجد وكانت صائمة شرقت ولما احضروا لها الماء لكي تشرب رفضت وماتت وهي صائمة وتالية للقرٱن رحمها الله واسكنها فسيح جناته

بابا توفي يوم الجمعه 9صباحا خلصنا كل الاوراق بمنتهى السهولة وجينا البيت سلمنا عليه كان بيضحكلنا ووشه ابيض و مشي كان طاير من البيت عالمسجد اتصلي عليه اكثر من 2000 شخص والشيخ يدعو له والكل بعد الصلاه يدعو له ويقول يا بختك يا حج وخدناه واتدفن ف مكان اتوجد ف ثانيه معأنه كان نفسه يشترى تربه قبل ما،يموت وحاسس،جدا وملحقش يشترى ... كان يوم 27 شعبان .. اخر جمعه من شعبان ... ادفن ف مكان جميل .. الله يرحمه ويغفرله

واحد قريبي صلي الفجر وقرأ ايه الكرسي وأذكار الصباح وقعد يسبح وهو جالس مكانه بعد الصلاه وربنا توفاه وهو علي جلسته وسبحته في ايده الله يرحمه ويحسن إليه ويجعل مثواه الجنه ويرزقنا حسن الخاتمه

اختي الله يرحمها من 7سنين  دخلت في غيبوبه ظلت فيها أسبوع وتوفت وهي في الغيبوبه واحنا بنغسلها السبابه مرفوعه كأنها تتشاهد وكانت سهله معانا جدااا في الغسل وتوفت اثناء صلاه الجمعه الله يرحمها

والدتي توفت يوم الجمعة وصلاة الفجر بتأذن وكانت يوم 27 رمضان والدكاترة قالوا انها في وسط الغيبوبة كانت بتقرا قران.ولما نزلوا يدفنوها التربي وولاد خالاتي قالوا انهم كل ماينزلوا بيها القبر كان القبر بينور نور جامد كإن الشمس منورة القبر من جوة..اسالكم الفاتحة والدعاء لها بالرحمة والمغفرة .

تيتا توفت في ليلة فردية في ال١٠ الاواخر من رمضان وكان يوم جمعه ويوم ما تعبت كان قبل الفجر بساعه مكنتش بتعمل حاجه غير أنها بتقرأ قرآن مش بترد علي حد بتقرأ قرآن بس وكانت مصممه أنها تصوم مع انها كانت تعبانه صممت أنها تأكل الزبادي وتنوي الصيام وفعلا نوت الصيام وبعد اذان الفجر بدقيقه توفت وصلينا عليها الجمعه

تيتى حبيبتى اتوضت عشان تصلى العصر وهى كانت دايما لازم تردد اول الادان قبل الصلاه قالت اشهد ان لا اله الاالله وان محمد واتوفت مفيش اجمل من كدا يارب اوعدنى واوعد زوجى وزريتى وامى وابى واصلا اليوم ده كان وشها منووور جدا جدااا انا كنت خمسه ابتدائى وسالت ماما تيتى وشها ابيض اوى كده ليه وكانت بتشوف اطفال حواليها وتقول ف اطفال بتلعب حواليا ونقولها مفيش حاجه وطبعا دول ملايكه الله يرحمها علمتنى حب الله والرسول وحاجت كتير اوووى الله يرحمها

جدي توفاه الله وهو ساجد في عصر 15 رمضان وهو صائم يطلع من 20 سنه سجد ولم يقف مره اخري اللهم تقبله من المخلصين

والدي االله يرحمه كان عنده سرطان علي الكبد الدكتور قال في مرحله متاخره هيبدا يرجع دم والكبد هيتفجر الحمدلله كل ده محصلش حاجه اتوفي ليله الجمعه وكان في غيبوبه وفاق رافع ايده بالشهاده وفجأه رجع وشه بعد صفره الكبد رجع ابيض حتي كان في جرح قديم في راسه حاول ياما يعالجه فجاه اختفي وصلينا عليه الجمعه اقسم بالله الناس مثل صلاه العيد كان ماشي واحنا هندفنه زي مايكون زفة عريس واول ماجم يطلعو مشو شمال فجاه الخشبه عدلت نفسها اجبرتهم يمشو يمين وقعدت اعيط كتير وجالي في المنام شاب صغير وقالي بتعيطي ليه انا والله كويس مش مت وفرحت بيكم ام زورتوني بس اللي زعلني دموعك متعيطيش تاني 

بابا الله يرحمه فى العشر الأواخر من رمضان اتسحر واتوضى وصلى الفجر وقبل طلوع النهار كان بجوار رب كريم وكان منظر مشهده رهيب من كتر الناس ولسه فاكرة شكلهم وهما ماشيين بيه كانه طاير من خفته..رحم الله ابى وغفر له وللمسلمين والمسلمات والمؤمنين والمؤمنات الأحياء منهم والأموات

خالى رحمة الله عليه اتوفى اخر جمعة ف شعبان وأمام المسجد قال إنه قاله قبل ما يموت بيوم أنه حلم أنه صلى الفجر من غير وضوء بعد مات ابنه حلم بيه بيقوله روحت فين يا ابويا قاله انا بصلى الفجر ورا حضرة النبي صل الله عليه وسلم رحمة الله عليك يا خالى رحمة الله عليك يا حبيبي

اللهم احسن خاتمتنا انا لله وإنا إليه راجعون اشهد ان لا اله الا الله واشهد ان محمدا رسول الله بصراحه شئ جميل يخلينا نعيد حسباتنا لان للاسف كتير مننا وانا منهم طول الوقت ماسكه التاب والفيس يااااارب اهدينا واصلح حالنا

كنت ف عمرة أظنها كانت ف رمضان وأثناء السعي بين الصفا والمروة قبل المغرب بقليل والجميع يجد ليلحق أن ينهي أشواط السعي قبل الإفطار .. إذا بإمرأة من بنجلاديش أو الهند أو أفغانستان مثلا مما يبدو من لباسها قد سقطت أرضا مصابة بأزمة قلبية ولم يستغرق الأمر ثوان حتى فاضت روحها إلى بارئها وصلي عليها العشاء 

ماتت صائمة محرمة ساعية ملبية على أطهر البقاع وصلى عليها فيه طوفان من البشر .. أي رزق وأي خاتمة تلك التي تأتي بامرأة تبدو رقيقة حال جداااا لتموت هاهنا وعلى حال كذا ؟!

بابا صلي العشاء ومات بعدها علي طول وكان مستعجل يصلي لدرجه قبل مياذن صلي وماما قالت له لسه ماذنش وعاد الصلاة تاني واتوفي بعدها علي طول واتشهد وعمي مات بعد متوضي ومستني صلاة الفجر جدتي بعد مغسلوها ضحكت وعنيها فتحت شويه من الضحكه وانا استغربت خالص لاني شفتها هما وبيغسلوها كانت مغمضه وعاديه

جدي الله يطيب ثرااه حين جاءته الوفاة كان الوقت بعد صلاه العشا وكان وصلت حالته انه كان يصلي بإصبعه وكان لا يترك فرضا الا اداه وكان يعمل احد معلمي الازهر الشريف وحين خروج الروح انقطع الكهرباء فأضات الغرفه بنور وجه رحمه الله

بابا الله يرحمه توفاه الله وكان ف الغربه وطالع على شغله والحمد لله كل اللى حلم بيه شافه ف مكانه عاليه مع الشهداء بإذن الله وادفن ف السعودية

اخو جوزى توفى يوم الجمعه وجه ف الحلم بيقول وزعو فلوس علشان ربنا نجانى واخر حاجة عملها كان مصلى المغرب ودخل ف غيبوبه وتوفى الجمعه الصبح

جارنا الله يرحمه بعد متوفي جم يغسلوه بيقولو مش ده الي كنا نعرفه خالص اتغير 180درجه للاحسن وجهه ابيض وحاجه ماشاء الله واول مخلصو غسله سمعو الراديو كان شغال ع القران جت الايه (الا ان اولياء الله لا خوف عليهم ولا هم يحزنون)صدق الله العظيم الله يرحمه ويجعل مثواه الجنه

وحده قريبتى اتوفت فى رمضان وهى بتتوضى عشان تصلى الضحى .. وقعت وهى واقفة على الحوض ..توفت صائمة على وضوء وهى تنوى صلاة نافلة.... ولما شفتها فى الغسل كنت ببصلها بطريقه كأنها رجعت شابه صغيره وكل ما افتكرها شكلها ده يجى في باللى. .. ربنا يرحمها ويحسن خاتمتنا

واحد جارنا مكنش بيفارق المسجد والصلاه كل وقت. .. اذن الفجر وصلى السنه. .وقعد يقرأ قرآن لحد الإقامه. .مات وهو المصحف فى ايده. .جم ينادوه عشان يصلى الفجر لقيوه ميت. ... ربنا يرزقنا واياكم حسن الخاتمة

بابا اتوفى يوم جمعة ولحظة خروج روحة جسمة كلة اسود للحظة وبعدها رجع للونة الطبيعى حتا القرح واماكن الحقن وغسيل الكلى كل دة راح وجسمة كان صافى

أغرب موته شوفتها واحد ورايا في الصلاه في مسجد بيصلي علي كرسي في سبحان ربي الأعلي وطي كان ميت وهو ساجد خرجت من الصلاه وعدلته وروحناه البيت بنته جايه تصوت قولتلها زرغتي مش تصوتي وربنا يرزقنا نفس الموته

ابويا طبعا وامي الله يرحمها ويجزيهم خير الجزاء متوفيه وهيا ع سجادة الصلاة وفي السجود حصلت الوفاة  ربنا يرخي علينا بالصبر لانهم كانو ملاك ع وش الارض

جارنا لسه متوفى يوم 22 رمضان كان لسه مصلى العصر وراكب عربيته ورايح يجيب مستلزمات المسجد وقبل مايتحرك جاتله سكتة قلبيه يعني خير من كل اتجاه ربنا يرحمه ويرحم الجميع

جدتي الله يرحمها قبل ماتتوفي كان ضهرها منحني ورفيعه جدلا ان سنها كان 80 سنه واول ماتوفت سبحان الله ولا اله الا الله وشها نور وجسمها فرط وتخنت ووشها صغر كانها رجعت شاااابه كنت لما بشوفها نايمه وادخل عليها الاقيها منكمشه في فرق هي وميته الله اكبر صغرت 50 سنه والتجاعيد اللي في وشها مافيش ونايمه زفاؤطه جسمها واخه السرير كله بطولها الله ي حمها هي واموات المسلمين جميل

رجل مات علي يدي كنا في العناية المركزة وجاء الرجل هوا وابنه الصغير وامه وعند وصولها فضل3ساعات متواصله يركع دم من بؤكه وانا والله مكنت اعمل انها سكرات الموت فسباح من انطقني وقلت له قل أشهد أن لا إله إلا الله واشهد ان محمد رسول الله ورد وراية الشهاده هذه المريض كان مريض كبد وهكذا قبلتني كذا حاله لأناث ورجال فكلهم كانو مرضه بل كبد احسبهم مع الشهداء

جارتي الحاجه فردوس كانت ست كبيره في السن ولاتشتكي بقلم لكن الحكايه الني كنت بجيب فول من علي الشارع وقلت لها مش عوزه حاجه ياست قالت لي الله يستر عرضك لاء ياقلبي بعدها اعده تفرق العيش للفرخ علي الباب وانا رجعه في نفس الساعه يدوب دخلت البيت فارحت ميته علي العتبه وكانت صايمه بصراحه الله يحسن ختمها ماتت وهيه اعده كده وصايمه ودعت لي قبل موتها بدقائق

جدتي الله يرحمها ماتت على وضوء واقسم بالله لما قبلت جبينها كان عليه عرق بارد ورائحتها كالعطور العربيه رغم أنها كانت مريضه جدا وتعالج والمرض كان يغير منها ومن ريحتها

واذكر والد صديقه كانت دعوته يموت ويدفن في المدينه المنوره هو كان دكتور في الجامعه انتدب ليحاضر في جامعه سعودية خلص وقرر يعمل عمره وهو في المدينه توفاه الله في حادث سير وقبض ودفن هناك رحمه الله عليه

بابا الله يرحمه يارب و يغفر له يا حبيبي كان تعبان يوم الثلاثاء باليل و مرضاش ياخد مسكن علشان ميفتهوش صلاة الفجر و فعلا نزل صلي فجر الاربع في الجامع و الناس اللي في الجتمع قالوا انه كان بيقرا قران بعد الصلاة و رجع البيت نام وبنصحيه لقيناه ميت ربنا يرحمه يارب و يغفر له يااارب ووشه كان منور جداا و كل التجاعيد اللي فيه اختفت و الله كانه صغر كتير جداا ووشه منور جدا بشهاده كل اللي شافه

حمايا الله يرحمه بعد مارجع من الحج كان سليم وعمره مااشتكى من اي مرض فجاه بعد الحج رجع عنده سكر وقرحه وفضل مريض فتره وفجاه خف وبقى كويس حتى السكر كان ظبط وبدا ينزل تاني يخرج ويدوب مكملش كام يوم ونزل متوضي مستنى الظهر ياذن عشان يروح المسجد توفي وهو قاعد مكانه منتظر صلاة الظهر الله يرحمه ويغفرله

عمتي ماتت وهي متوضي لصلاه الضحى وجدتي ماتت وهي متوضيا لصلاه العصر ماتت أثناء اقامه الصلاه وكان اللي يذكرها بالله هي اللي تذكره و أثناء الاحتضار كانت تقول أن الله وملائكته يصلون على النبي ياايها الذين آمنوا صلوا عليه وسلموا تسليما رحمكم الله

لسه قربيتنا اول امبارح شابه صغيره اتسحرت وصلت الفجر ونامت جوزها بيصحيها علشان تروح الشغل لاقها ماتت وكانت ليله من ليالي القدر وماتت صايمه وصلوا عليها في صلاه الجمعه ربنا يرحمها ويجعلها من اهل الجنه ان شاءالله

بابا حبيبي الله يرحمه كان قارئ الجزء بتاعه ولما مقدرش يكمله خلى بنت خالتى تقراه وهو يسمع وكان بيصححلها القراءه كل ده قبل مايتوفى بنص ساعه ودخل اتوضى وقولناله انت تعبان صلى وانت قاعد قال انا بحب اسجد وعمى كان بيعيط جنبه قاله متعيطش قول يارب وكان عمال يذكر الله ويتشاهد ويبص ف الساعه ومات وايده ف ايديا ولا شهق ولا طلع اى صوت اكنه نام وكل ما احلم بيه اشوفه ف جناين او بيعمل عمره

احكى موقف حد تعرفه مات على حسن الخاتمة

الزوار يقرأون الآن | ايه اجمل الدعاء اللي ممكن اقوله لما احس اني مش عارفه اقول ايه لربنا ؟

والدى الحمد لله كان يرعى مسجد بناه جدى وكان هو دائما يخطب بالناس يوم الجمعه والأعياد وفى مره فى صلاه العيد ذهب هو وعَمَى لصلاة العيد وكان المسجد فى بلد ارياف فوصلوا بدرى فقاموا بمسح المسجد وتنظيف الحمامات وطلعوا يستريحوا قبل الصلاه فولعوا خشب للتدفئه وقفلوا الشبابيك والابواب وكلمنا وحكى لماما فى التليفون اللى حصل بالضبط وقفل وكان ده اخر مره نسمع صوته لقد توفاه الله برحمته لقد مات يوم وقفة العيد الصغير وبجانبه الخطبه التى كان ينوى ان يلقيها للناس هذا هو ابى رحمة الله عليه وعلى اموات المسلمين 😔😔😔

ابويا الله يرحمه وينور قبره ويسكنه فسيح جناته توفى فجر الجمعه اللى قبل وقفه عرفات على طول ربنا يرحمه ويجعل قبره روضه من رياض الجنه

شيخى الجليل عبدالعظيم محفظ قرأن كان بيأم بالناس فى صلاة المغرب وخلص وبيصلى السنه ومات وهو ساجد اسأل الله العظيم ان يجعله من اهل الفردوس الأعلى وان يدخلة الجنة بغير حساب ولا سابقة عذاب وبابا رحمه الله كان مريض بالكبد وكان فى غيبوبه واتشاهد وتوفى لدرجه كل اللى موجود زوهل لأنه كان فى غيبوبه استمرت اكتر من شهر

جدي عليه رحمة الله اتوفي ليلة جمعه اتشاهد اكتر من مره وكان بيصلي عالنبي لحد اخر نفس جنازته مشي فيها آلاف لدرجه ان المسجد كبير والشوارع ال حواليه اتملت بالمصلين راحت الكنيسه فتحت الساحه ال فيها عشان الناس تدخل تصلي البلد كلها وناس من كل المحافظات جت الجنازة وهو الله يرحمه لا حد مشهور ولا نائب مجلس شعب إنسان عادي كان بيحب الناس ويساعدهم الله يرحمه ويغفرله ويرفعه درجات عنده

جدو الله يرحمه اتفتح قبره بعد 25 سنه لدفن خالي لقوا جسده متحللش وكفنه ناصع البياض كأنه لسه مدفون وكل اللي كانوا واقفين قعدوا يكبروا واخويا كان واقف وشاف الموقف بنفسه

وابنه مات مكنش بيصلى ولا بيصوم فى يوم قال انا قررت هصوم رمضان السنه دى وخد دش ونزل يصلى الفجر طلع قعد شويه وقعد يشتكى من صدره ومات سبحان الله 

سلفه اختي ليله وفاتها المستشفى كلها كانت ريحتها مسك و جوز اختي وجوزها رفعوها وفضلت ريحه المسك في ايد جوز اختي فتره مش بتروح

صلي الظهر واستدار ل قبلة الموت وقال اللهم لا حول ولا قوة الابالله قالها ثلاثا ثم فاضت روحه كطائر برئ 
اللهم ارحمه رحمة من لدنك اللهم الجنة بلا حساب ولا سابق عذاب

بابا الله يرحمه وهو في العنايه المركزه كان يوم الأربع كان بيشاورلي علي عناقيد العنب وشجر التفاح وأحسب انه كان يري مقعده من الجنه ويوم الخميس قرأنا وختمنا سوره الكهف سوا قبل مانمشي من المستشفي وتوفي يوم الجمعه وهو ماسك سبحته فإيده ووجهه مبتسم الحمد لله ❤

جدي الله يرحمه ويغفرله وهو في المستشفي وكان بيموت ومحدش حاسس بيه كان كل شويه يقوم من سرير المستشفي ويروح ينام فجامع المستشفي وكان جنب اوضته وكان ينام فيه ويروحوا يجيبوه مرتين علي كده المره التالته راح لما راحوا يجيبوه لقوه ميت هناك فاتجاه القبله

جدتي الله يرحمها كانت ست جميلة جدا في اخلاقها وتدينها كانت دائما تقرا القرآن وتسمع القران وتصلي
وفي اواخر ايامها اشتد عليها المرض لدرجة بتر صوابع قدمها 
وكانت صومها قومها حمدة لله وشكرة فضلة
وقبل موتها بكام يوم شافت رؤية ان صوت بيقولها كتابك منور ومفهوش اي سيئة وبيقولها شوفتي يافردوس كتابك نضيف 
وهي اصلا اسمها فردوس
ويوم موتها كانت طريحة الفرش والعجيبة عند الاحتضار قامت من على السرير ودي معجزة لانها كانت لا تقوم الا بمساعدة 
واتجهت للقبلة وقالت الشهادة واتوفت بعدها
والمغسلة وهي بتغسلها طلعت تقولنا انها كانت شمة ريحة مسك جامدة في الغرفة

جدي مات ساجد بس الاصعب بقى زوجة أخ طالب عندي كانت ألمانية و كانت مهتمة اوى باخو جوزها مع انه كان بيقول أنها جوازة مصلحة و لما قعدت معانا و في مصر قررت تبقى مسلمة اتحايلت عليه كتير احنا كنا وقتها في الغردقة انه يوديها الأزهر تشهر إسلامها و هو مكانش في باله لحد ما زهق من زنها وداها و غيرت اسمها و اشهرت إسلامها و لبست الحجاب و هما راجعين في نفس اليوم عملوا حادثة هي اتوفت و هو طلع سليم

تيتا الله يرحمها كلمتنا بليل 
ماتت وهي صايمة فجر يوم الخميس وهي بتصلي وتسبح 
تيتا عاشت سيرتها طيبة وماتت ع حسن الخاتمة وده كان دعاءها دايما متتتتعبش حد من عيالها وتموت ع حسن الخاتمة وربنا نولهالها لانها كانت اطيب قلب ع الأرض 
ربنا يرحمك يا تيته ويحسن اليكي ويجزيكي عنا خير💖

خالي الله يرحمه صلي الفجر في المسجد وقعد يقرأ قران لحد الشروق وبعدها قام سلم علي المصلين والامام كأنه بيودعهم وركب الميني باص علشان يروح يسلم علي والدتي مات وهو قاعد في الميني باص

امي كانت تغيب تغيب وتفوق تقولي انا ممتش ليه وزعلانه اوي انها مامتتش وتفضل تبص ع جسمها وتقول يووووه كل دا مامتش وتقولي انتو لبسين اسود ليه لونه متلبسوش اسود مع اننا مكنش لبسين اسود اصلا..وبعدها لما سألت هي ليه بتقول كدا قلولي شايفه مكنها ف الجنه ومستعجله عايزه تروح ويوم موتها مع ان المرض كان هدها وخست واسودت يوميها رجعت لصحتها وبقت بيضه بغباء وتخنت و نورت كدا وبعدها جتلي ف المنام وقلتلي انا بقيت كويسه وكنت منوره اوي وحضنتني ومشيت رغم ان كل دا حصل وانا عندي ١٥ سنه بس لسه فكره كل حاجه بالتفاصيل ...ربنا يسكنها الفردوس الاعلي يارب ويرحمها برحمته

والدي مات بعد الحج بي 15 يوم مات بي سلطان في المعده ومن مات بي دا في بطنه فهوا شهيد 
وعمي مات في رمي الجمرات واندفن في البقي وي والدي مات بعدي بي 15 يوم بس في مصر 
الله يرحمهم ويغفر لهم

خالى الله يرحمه توفى وهو صايم ف رمضان وكان ساجد ف صلاه المغرب وجنازته كان فيها ناس من بلاد جنبنا ربنايرحمه يااارب كان طول الليل قاعد قدام البيت يقرقران بصوت عالى اوووى ولما سالناه ليه صوتك بيبقى عالى كده قال من حلاوة القران مببقاش حاسس ان صوتى عالى ومن كتر ما القران بيزلزل قلبى صوتى بيعلى اوووى وكان بيبكى اووووى اثناء قراءه القران ربنا يرحمه يارب ويلحقنا بيه ع خير يااارب

بابا الله يرحمه كان ع سرير المستشفي عمره مقال اه ديما كان بيقول يالله انتا الشافي وانتا الكريم الحمد الله 
لحد ما مات وهو بيصلي ويقرء قرءان ويقول كده 
كل الي في المستشفي عرفوه وكانوا بيحبوا قووي كان بينادي للممرضين عشان عاوز يصلي بيهم زي مكان بيصلي امام بالناس 
عدي سنتين ورحت المستشفي والكل فاكرني ويحكيلي عن بابا وصبره في المرض 
الحمد الله اللهم اجعله من الصابرين والحامدين والشاكرين واسكنه الفردوس الاعلي يارب

بابا النعش بتاعه كان بيجرو بيه انا مشوفتش خالاني وجوز اختي حكو لينا مفروض كان رايحين جامع والنعش مش رضي يركب العربيه وراح ناحيه جامع تاني قصاد جمعيه بنعمل فيها عزانا وكان فيها واجب تاني لشاب كان شهيد في الجمعيه النعش وصل قبل العربيات وكان بيتكعبلو من كتر الجري ودخلو الجامع والعربيات بيتصلو اتاخرو ليه قالو ليهم احنا جوا بالنعش وصلنا قبلكو وكل الي في عزا الشهيد مع الي كانو في الدفنه طلعو يصلو ع بابا وكان الجامع زحمه اوي .. بابا الله يرحمه ربي تلات بنات كبرنا وعلمنا تعليم كويس ودخلنا كليات وعمره ما طلبنا منه حاجه رفضها كان بار بجدتي جدا كانت في بلد تاني كان لو طلبت عينه كان بيسافرلها مش بيستنا صرف ع عيال عمتي كانت مطلقه وخلي عمامي يتنازلو ليها ع البيت عشان متتمرمط كان بشهاده الناس طيب وفي حاله مالوش في الكلام ولا يحيب سيره حد اخر 5سنين في حياته تعب جدا وكان بيتحرك بصعوبه وفقد السمع بيسمع ضعيف ربنا يرحمه

ياااااه ... أمي رحمها الله توفيت بحسن خاتمه اسأل الله ان يكتبها لي 
كانت بتعدل نفسها على القبلة و هي في سكرات الموت ... كنا بنلبسها عشان تروح المستشفى رفضت تنزل من البيت غير لما تصلي العشاء مع إنها كانت روحها بتخرج لكنها رفضت تنزل قبل ما تصلي و رفضت تنزل من غير حجاب ... و سبحان الله كانت في غيبوبة جلطة و كنا بيها في المستشفى نلاقيها مره واحدة بتردد الآذان و احنا حتى مش سامعينه و فعلا كان بيبقى وقت صلاة من الصلوات ... ربنا يرحمها و هي مريضة بالقلب و جلطه و كانسر كان مفيش يوم يعدي غير اما تصلي قيام ليل ... أمي كانت قطعه من الجنه ... اقسم بالله مش عشان أمي لكنها فعلا حته من الجنه رحمك الله يا انقى أم

ابويا الله يرحمه كان تعبان جدا فالمستشفى وف ليله صمم انه يروح البيت وقبل ما يروح تصدق على كل الممرضات اللى فالمستشفى وكان بيكلمهم فالدين كتير جدااااا ولما روحنا انا كنت جنبه وقولتله قول يا بابا لا اله الا انت سبحانك انى كنت من الظالمين قالها كتير اووى وقعد يستغفر ربنا كتير وانا بحط ايدى على راسه لقيت جبينه عرقان بعدها بثوانى مات وهو بيقول لا اله الا الله 😢😢
ومن علامات حسن الخاتمه عرق الجبين وكمان روحه طلعت مافيش حد حس بحاجه ف ثوانى

وحده اعرفها كانت ست طيبه وبركه كده كانت بتعمل استخاره دايما فى اى حاجه تقابلها وكانت عاوزة تسافر ومحتاره فعملت استخاره وشافت تفاصيل موتتها ومسافرتش وقتها بس بعد شهر نسيت الحلم او سلمتها ربها مش متاكده فماتت بنفس اللى شافته فالرؤيه ربنا يرحمها الكل يشهد لها بالطيبه وقربها من ربنا يارب احسن خاتمنا مثلها

بابا •اللّـہ̣̥ يرحمه كان مّرَيَـضّ ومش بيتكلم واليوم اللي مات فِيَھ اتكلم وقال عايزه اصلي صلاه الجمعه وقرا قران ومات وصلو عليه صلاه العصر •اللّـہ̣̥ يرحمك ياحبيبي واجعل مثواه الجنه يااارب

بابا اتوفي في السعوديه وماما 22 رمضان وخالي 27 رمضان وخالي الكبير في الجامع وهو بيقوم صلاة العشاء وخالتي وهي سجده بتصلي وخالي الصغير وهو بيصلي الجمعة في المسجد وغرهم كتير عقبالنا يارب

عمتو الله يرحمها ماتت يوم 10 رمضان وقت اذان المغرب ومكنتش فطرت ماتت صايمة تعبت وراحت المستشفى اول مطلعت عالسرير نطقت الشهادة وماتت وبعد متغسلت كان اكنها بنت فالعشرين ملامحها مكنش فيها اي علامات كبر وصلينا عليها صلاة الضهر ومن كتر الناس اللي صلت عليها كانت اكنها صلاة جمعه مش ضهر وعلامات تانية كتير ظهرت ف جنازتها ربنا يرحمها يارب

جارنا الشيخ عيسى الطيب لسة متوفي إنبارح رحمة الله عليه ميت بصحته وصايم ومصلي الفجر ومواظب على صلاة الجماعة في المسجد وكان رحمة الله عليه يسلم عالكبير والصغير وعمره ماجاب سيرة حد وراجل فلاح ومات في حقله أثناء عمله وكمان من كتر الجوايز يموت غرقان وفي آخر 10 أيام في رمضان يعني شهيد وصائم ومصلي وطيب السيرة اللهم أعتق رقبته من النار وأحسن خاتمتنا جميعا

ابن اختي كان مدرب غوص وسباحة وغواص محترف وكان شغال في شرم وبعدين فجاءة قرر انه مش هيشتغلها تاني علشان الاحتكاك والأجانب وراح اشتغل مدرس العاب بيقبض ملاليم وبعدين جاله شغل في بنك وبعد ما اشتغل ساب الشغل وقال دي فلوس ربا وقعد في البيت وبعدين ربنا كرمه بعد عسر واشتغل في شركة بترول وأعفي لحيته وصاحب ناس صالحين واتغير حاله الي خير حال ويوم 21 رمضان ده وهو معتكف أذن العصر وصلي بالمعتكفين إمام وجلس يعظهم ويذكرهم بالله ثم مات في لحظتها 

والدي رحمه الله عليه توفي الي رحمة الله تعالي فجر يوم الجمعة ما بين الأذان والإقامة وقبل خروج الروح ردد ثلاثة مرات الحمد لله .الحمد لله .الحمد لله ..ربنا يرحمه ويجعل مثواه الجنة ...
وكذالك زميل في العمل (الحاج/ نبيل محروس)... توفي أثناء الطواف بالكعبة في الحج... اللهم ارزقنا حسن الخاتمة....

كتير اوي الحمد لله 
اولهم عمي رحمة الله عليه توفي ساجد في صلاه الفجر او القيام الله اعلم 
تاني يوم لقيناه متوفي ساجد من بالليل و منعرفش بالظبط 
تاني حاجه عمتي رحمة الله عليها اتوفت ف اخسن خاتمه ف الدنيا ذكر الله لم يفارق لسانها حتي فاضت روحها إلي بارئها 

تالت حاجه جارتنا اتوفت يوم الاتنين بعد العيد الصغير و هي صايمه و متوضيه و مستنيه تصلي العصر

رابع حاجه ابن صاحب والدي الله يرحمه صخي صلي الفجر و صحي اخواته كلهم يصلوا مع انهم مش بيصلو لكن وصاهم بالصلاه و قال الاذكار و نام و صحوه لقيوه متوفي والدي كان مُنهار لما عرف انه اتوفي لان قبل وفاته بيوم كان مع بابا اليوم ده كله

بنت واحد جارنا رحمة الله عليها و علي ابوها اتوفت ف المستشفي كانت مريضه اتشهدت و فاضت روحها إلي بارئها 

والد صحبتي اتوفي من يومين ف الاعتكاف يوم الجمعه و هو بيقرأ قرآن و الفيديو بتاعه مالي النت

اخو صاحبة صاحبتي اتوفي الجمعه ال فاتت ف حادث اثناء توزيع الافطار ع الصائمين

والد صحبتي اتوفي يوم عرفه و دفن هناك
و هكذا

اول امبارح جارنا اتوفى وهو ساجد ورمضان اللى فات بردو اخوه مات وهو ساجد وجدى وهو نازل من المسجد فى صلاة الفجر كان عمره 85 اتكعبل واتوفى بجد اكبر مثال انى الانسان عمل وسيرة حسنة بتفضل من بعده

عمتى الله يرحمها قعدت فتره في توهان و مش بتصحى و مره واحده فى يوم صحيت من قبل الفجر و صلت قيام الليل و قعدت تقرأ قران و بعدين صلاه الفجر و كملت قران و بعد كده صلاه الضحى و ختمتها و فتحت المصحف تكمل قراءه و بعدين خرت اخر انفسها الكلام ده كان رمضان اللى فات 
اللهم اغفر لها و ارحمها هى و اموات المسلمين جميعا

بابا الله يرحمه كان حافظ للقران وخاتمه بحيااته وكان كاتب عدد ختم القران علي اخر صفحه مدي حياته وكان قبلها بيوم الوفاه طلب رز باللبن ولما اتنفذ طلبه قال خلاص كده مش هاكل منه وتوفاه الله بعد صلاه الظهر وكان يوم جميل بيضحك فيه لدرجه غريبه من الفرح والسعاده ربنا يغفر ويرحم ويرسل لهم نسائم رحمته علي قبورهم امين يارب العالمين

من عشر أيام واحد وقف قدام جامع في السيدة زينب وكان شارب وبيقؤل كلام مش موزون وحالته غريبه وكان عايز يدخل يصلي التراويح مع الناس فالناس مرضيتش تدخله وقعد يزعق ويطوح ويقؤل كلام مش مفهوم وريحة الشرب معبيه المكان اللي فيه وفي الفاصل بين التراويح طلعله شيخ الجامع ودخله ودخل بيه الحمام ومعاه كام واحد ومعرفش جابوله هدوم منين وخلوه يتوضأ والشيخ خلاه يقف في الصف الاول وراه وبعد اما خلصوا صلاة لاقؤه ساجد زي ما هوومش بيتحرك بيهزوه لاقؤه مات 
الشيخ قاله ما الذي بينك وبين ربك عشان تحسن خاتمتك بالشكل ده والموقف ده حصل قدام ناس قرايبي
اللهم أحسن خاتمتنا جميعا

الله يرحمه بابا مات علي حسن الخاتمه كان مريض كنسر قبل لما يموت بيوم صحي وقالي لما عايز يتوضا وصلي وهو مش بيتحرك نايم علي السرير وفضل يصلي ويقراء القرأن الكريم والتشهد كامل يوم كامل علي كده انا قولت دخل في غيوبه وصورته فديو صوته كان عالي وجميل وفاجاه الردايو اتقفل علي سوره
· (( يَا أَيَّتُهَا النَّفْسُ الْمُطْمَئِنَّةُ ارْجِعِي إِلَى رَبِّكِ رَاضِيَةً مَرْضِيَّةً فَادْخُلِي فِي عِبَادِي وَادْخُلِي جَنَّتِي )
وما شتغلش تاني وبابا الله يرحمه فضل يوم كامل يقرا رغم ان الكنسر كان مرحله رابعه ووصل للرئ ومكنتش صوته بيطلع بس سبحان الله ربنا رحمه ومات علي ذكر الله
وما اجمل خاتمته 
كانت رائعه ووشه وانا بودعه بيضحك رجع زي ما كان قبل المرض واحلي الله يرحمه ويحسن خاتمتنا يارب

جدتي الله يرحمها وهي رجعه من العمرة وقفوا في الطريق علشان يصلو الظهر نزلت تصلي فضلت ساجده وطولت في السجود توفت وهي سجده ورجعه من العمرة الله يرحمها

أمي ماتت تالت يوم رمضان وكانت مصليه القيام والفجر وماتت وهي صايمة ربنا يرحمها ويغفر لها ويتجاوز عن سياءتها ويجعل قبرها روضة من رياض الجنة

امي كان صايما ف نص رجب دخلت ف غيبوبه من الصبح واتوفت الظهر من اول ما دخلت ف غيبوبه وهي بتقرا سوره الكوثر كان حد بيلقنها صوتها كان مسمع المستشفي كلها وكل الناس كانت بتردد وراها.

ايام المظاهرات وحظر التجوال
صاحب محل فراخ بالسويس
كان مروح او رايح مزرعته بعد العصر او المغرب 
جاتله رصاصه تقريبا بالغلط لان

الطريق طويل جداااا 
وفضل ينزف كتير ومعرفوش يلخقوة بالمستشفى
ماشاء الله اللهم بارك
وشه كان ابيض منور وبيبتسم ابتسامه واضحه وصريحة وعرق الجبين واضح بالصور
مامته كانت بتزغرد وهما خارجين بيه من الجامع
بعد كدا عرفنا من بابا غير اخلاقه الحلوى وكل حاجه
انه كان بيطلع فراخ المعتكفين والمصلين فرمضان فجامع ما والجامع كبير فعلا بيشيل اعداد كبيرة
وياعالم كان بيطلع اد اية للفقراء

جدتي الله يرحمها قبل الفجر فجاه لقيناها بتفتح الباب ونازله تجري جرينا وراها لقيناها وقفت قدام الجامع عقبال ماجبنالها كرسي كانت توفت الله يرحمها و يدخلها فسيح جناته يارب

خال بابا الله يرحمه ويغفر له ويسكنه فسيح جناته لسه ميت يوم الخميس اللى فات 😍😍😍

خالي توفاه الله فالغربه وهو يسعي لاجراءات دفن واحد ميت بعد مخلصلوا إجراءات الوفاه توفي جنبه وانتقل للبقيع للدفن خلال اربع ايام وعندما عري جسده ليغتسل من جديد وجدوا رائحه جميله تخرج منه ولم يمس جسده اي شئ ودفن فالبقيع بالسعوديه وامي توفاها الله وهيا مبطونه وقبل متدخل فغييوبه كان شبه مشلوله صممت علي التوضأ وصليت ودعت لكل اخواتي وراحت بعدها فغيوبه وأثناء غسلها كان تبستسم ابتسامه تقشعر لها الأبدان الله يرحمهم ويلحقني بحسن الخاتمه مثلهم

مامتي حبيبتي من أسبوع واحد كانت تعبانه وعندها ازمه تنفسيه وماكنتش حاسه بينا فجأه لقيناها بتصلي ولمانقولها انتي مش متوضيه تزعقلنا وتشتمنا وتكمل وراحت اتوضت بعديها وصلت برضه ونامت مش صحيت يا قلبي الله يرحمها ويغفر لها يارب ماتت في أيام المغفره صايمه

والدي توفي وهو عنده السرطان بالدم وتعب في شهر 1 جدا ودي كانت النهايه احنا منعرفش ان المرض ده نهايته دور سخونيه جامده وسبحان الله كان راضي وقال باذن الله ربنا بيحبني وهتوفي في رمضان ونالها الحمد لله اتوفي فعلا في رمضان ربنا يرحمه ويغفرله ويجعل مثواه الجنه هو وامواتنا جميعا

امى الله برحمها اتشاهده قبل طلوع الروح وكانت ضحكتها ملا وجها والمغسله وهى بتغسلها ابتسمت جامد وطلع من وجها نور جامد والمغسله بقت تهلل وتقول الله اكبر الجنه ونعيمها وجدى ابوها الله يرحمه وهو بيطلع فى الروح نظر لسقف الغرفه وقال ادخل يامحمد ابا بكر وابتسم وطلعت روحه الله علي حسن الخاتمه

تيته بعد م زاد عليها التعب ومكنتش قادره انها تتحرك ف يوم واحنا قاعدين صممت انها تدخل تاخد شاور وتغير هدومها مع انها كانت بتتوجع وفعلاً دخلت واتوضت وطلعت قعدت ع الكرسي وصليت ركعتين وقالتلي هاتي المصحف ده هقعد اقرأ شويه وفتحته وبعدها بدقيقتين توفت 
كانت دايماً بتدعي انها تقابل ربنا ف احسن حال وانهاا متتكشفش على حد يغسلها وفعلا حصل 

جارنا راجل كبير فى السن وكان مريض ويصر على النزول لصلاة الفجر ولماتعب اشتدمرضه بقى حد من جيرانه ينزله يصلى لانه متجوزش ومعندوش اولاد نزل لصلاة الفجر الشهر اللى فات شهر شعبان وهو بيصلى توفى الى رحمة الله الله يرحمه عم سعيد

صاحب اخويا من البلد.
كان تاجر علف دواجن وادويه بيطريه.شغال تمام وزي الفل.عنده 3بنات ومراته قمرررر.
يشاء ربنا انه يخسر كل مليم ويندين.فتجيله جلطه ويتشل.مراته شالته في عنيها حوالي 6سنين وبقت تروح بيه جلسات العلاج الطبيعي..وهم راجعين في رمضان يتقلب الميكروباص ومراته تموت.وهو يعيش.عاش علي كرسي بعجل 3سنين بدا يتحسن وساب الكرسي وبدا يتحرك ..وفي رمضان وهو واقف بيصلي التراويح مات.مات وهو واقف البلد كلها كانت بتتكلم عن خاتمته وصبره وجزاؤه.الله يرحمه ويرحم زوجته ويغفر لهم

خالي اليوم اللي توفي فيه الصبح راح اشتري 500كرتونه مواد غذائيه عشان يوزعها ع اسر الفقراء بعد الضهر كان مطلع رحله ايتام بعد العصر كان بيوزع وجبات افطار للصائمين لحد م المغرب اذن عليه وهو بيوزع طلع بعدها البيت عشان ياخد الدوا ويغير هدومه وعامل اتصلاته انه رايح يجيب اجهزه كهربائيه للعرايس الايتام لكنه توفي رحمه الله وف رمضان

بابا 😢 ربنا يرحمه ويغفر له ويسكنه فسيح جناته يارب كان حاتم القرآن ومصلي العصر ومتغدي معانا واليوم ده منزلتش شغل وكان ليه شويه مزاجات ف الاكل وعاوز قهوه 😢 كان كويس وقاللي ساعه الغداء انتي بتزودي الملح ف الاكل وقعد يهزر فجأه صدره وجعه مكملش ساعه اتوفى كان بيتمنى يتوفى بين المغرب والعشاء وربنا استجاب وف لمح البصر مشي وراح مكان احسن مليون مره من هنا حبيبي رحمه الله عليه ربنا يرحمه ويغفر له ويسكنه فسيح جناته عمري ما هلاقي حد ف حنيته عليا حبيبي روحت وراحت معاك كل حاجة حلوة بس انا متاكده انك ف مكان احلى واحسن من هنا بكتير ربنا يحسن خاتمتنا يارب 😞😢

مات وهو بيتوضى لصلاة الجمعه اتوضى وقال الشهاده ووقع ع الارض مات فى ثواني سلم الروح الى باريها دخلت اشوفه سبحان الله وكانه بقى اصغر عشرين سنه وجهه مبتسم وسبحان الله اختفت التجاعيد اللى فى وجهه ووجهه كان مشدود وصافى وجميل ومنور ❤

جدتى كانت زاهدة الدنيا بكل ما فيها فلوسها حزء منها بتفرقة على ولادها واحفادها والباقى بتتصدق بيه والناس كلها بتحبها وتدعلها لو حد بيبنى تروح وتساعد معاه حد ببتجوز تساعد فى الشوار ربت 6 اطفال بعد وفاة زوجها كل حياتها صلاه وعبادة وشغلها لما كبرت وطلعت معاش بقت حياتها لربنا صيام وصلاه والصدقات وكانت رافضة اى هدوم جديدة حتى سجاد فى شقتها لو حد من اولادها بيجبلها حاجة تديها لحد محتاج وتقول انا ليا فى الاخرة حتى الاكلة الحلوة لازم تتدوق منها ولادها كنا فى بيت واحد تعبت قبل وفاتها ب 25 يوم ومفيش دكتور بيقول عندها حاجة وكنت بنام معاها انا وبنت عمى الوقت اللى بنسبها فية وقت الفطار عشان رمضان جة علينا وقت تعبها افطر بسرعة وانزل .... نزلت بفتح الباب لقيت بخور او دخان طالع من الاوضة وريحة حلوة وريحة صدرها حلوة اووى توفت يوم 20 رمضان دى اكبر فاجعة فى حياتى ربنا يرحمها ويلحقنا بيها على خير مهما اقول واوصف انا مقولتش

بابا الله يرحمه مات من 18 يوم كان بيزور حماتي علشان تعبانه وكان كويس وراجع شاف بنت صغيره تعبانه من ذوي الاحتياجات الخاصة اداها اللي فيه النصيب ورجع البيت وقع ف المدخل الرجاله شالوه اختي قالتله اتشاهد ي بابا قال اشهد ان لا الله الا الله وصوت شخير طالع ومات ف ثواني

امى ماتت يوم الجمعه كانت مصليه الجمعه ف المسجد ومشيت عشان تجيب لبس المدارس لينا كنت اكبر واحده عندى ١٠ سنين وقعت ف ترعه كبيره قوى وعمقها غويط والغواصين كانو متوقعين خروجها مش اقل من اسبوع اول ليله طافت ع المايه ونحسبها من الشهداء 😭

ابوية كان مشغل قران فى البيت كله ونام فى اتجاه القبله وقعد يكلم عصافير فى الجنيه معرفش بقى ملايكة ولا ايه...وكان مشترى قبلها قبر فى البهنسه مكان مدفون فيه بعض الصحابة ...واتدفن فيها وجدى اتدفن بعدها بست اشهر لقينا جثة ابى كما هى وسالنا علماء كتير من الزهول وقالولنا ماشاء الله دى منزلة الصالحين....ويوم جنازة جدى بعد ماشافو جثه ابى زى ما هى قعدو يقولو الله اكبر الله اكبر ☺

جدي الله يرحمه كان وهو ف اخر ايامه وماكانش فاكر ولا عارف حد فينا خالص كان دايما يقول في نخل شاقق الحيطة وخارج منه وكان بيقول الطير عمال يطير فوق منه الله يرحمه ويغفر له ويسكنه فسيح جناته هو وكل اموات المسلمين

امى الله يجعلها من أهل الجنه كانت عيانه اووى وبصيت لقيتها بتترحم على نفسها وتقول الله يرحمك يا سعدية
استغربت سعدية مين غيرك انتى تقصدى مين قالت ربنا يرحمنا جميعا وفضلت اكتر من ساعه تتشاهد لحد ما قطعت الكلام بقت تتشاهد بصوباعها لحد اخر نفس وبفضل الله كان آخر كلامها كن الدنيا شهادة أن لا إله إلا الله وأن محمداً رسول الله
ادعولها بقى بالله عليكم ادعولها وحياة أغلى شيئ عندكم الله يرحمها ويغفر لها وينور قبرها ويسترها يوم العرض ويجزاها عنا كل خير ويجمعنا بيها فى الجنه

اخويا كان شاب عادي خااالص حتي الصلاه مكنش ملتزم وفجاه تعب وطلع عنده كانسر بس هو معرفش وماقلنالوش قعد عشرين يوم بالظبط ومات تالت يوم عيد الفطر وكان اول رمضان ف حياته يصلي ويختم القران ومات يوم الجمعه مع اذان الظهر مع العلم ختم القران وصلي وهو مايعرفش انه عنده حاجه اصلا وقبل ما يموت بيومين قال لماما انا مرتاااااح وراضي ولما اخف في حاجات كنت بعملها غلط عمري ما هعملها تاني ربنا يرحمه ويغفرله

عمى الله يرحمه صلى الفجر وجهز الاكل لبنته اللى بتشتغل مدرسة واللى صاحباتها بيحبوا ياكلوا الفول المحبش من ايده ونزل وصلها ورجع استحمى وصلى الضحى وقعد يتفرج على محمد حسان ع قناة الرحمة وقال لزوجته حاسس بمغص وفجاة استرد الله وديعته وكان فى قطرات عرق ع جبينه وصلوا عليه العصر واندفن رحمة الله عليه

امى الله يرحمها ويرحمها ويغفر لها وتجعلها رفيقه لسيدنا محمد صلى الله عليه وسلم قبل ماتموت بربع ساعة كانت فى غيبوبة قامت ولاكانها تعبانة وقرأت سورة الإخلاص وماتت ليلة الجمعة ودفنت يوم الجمعه اللهم اجمعنى بيها وجمعنا مع سيدنا محمد صلى الله عليه وسلم

أبويا مات اول يوم شعبان يوم الخميس ليلة الجمعة واتصلی عليه صلاة الجمعة والجنازة بعدد لا يحصی ولا يعد واتدفن بعد صلاة العصر وأول سنوية ليه كانت يوم جمعة ربنا يرحمه ويجعل كل ألم تألمه فی ميزان حسناته آمين يارب العالمين

خالي الله يرحمه مات في يوم من العشر الأواخر من رمضان يومها فطر الناس علي محطة القطار فرق اكواب من التمر عليهم ودخل بيته ال علي السكه الحديد وبعد ماصلي العشاء والتراويح قعد مع أصدقائه شويه بعدها قال لهم يالا كل واحد يروح بيته عايز أقرأ شويه في المصحف قالوا له ما انت ختمت المصحف من كم يوم قال لهم لا عايز اختمه تاني انا قربت اختمه تاني أن شاء الله ومشيوا وهو مسك المصحف وزوجته وأولاده نايمين صحيوا علي صوت هبد علي الأرض فالموت لقيوه وقع والمصحف في أيده واتشاهد علي نفسه وبقي ينده علي الجيران يتشاهدوا عليه اخد دقائق بعدها فاضت روحه إلي بارئها الله يرحمه ويحسن إليه

امي ماتت تاني يوم عيد الاضحي ١١ ذو الحجة الساعه ٩ الصبح وكان يوم جمعه وقالو مستحيل هتلحق صلاة الجمعة بس ربنا سهل كل حاجة واللي بيغسلوها بقو يقولو دي مغسلة نفسها وطول الغسل يقولو ماشاء الله ووشها كان مبتسم ورجعت لشكلها قبل ماتتعب واحسن ولحقت صلاة الجمعه وماشاء الله صلي عليها ناس كتير جدا

جدتي توفاها الله يوم ١٢ رمضان وكانت لسه مخلصه صلاه الظهر ومتوضيه ومستنيه اذان العصر وكانت صايمه ولحد ما اذان العصر اذن واحنا معملناش اي حاجه لا غسل ولا كفن ولا كنا جهزنا اي حاجه خالص وسبحان الله كل حاجه خلصت بسرعه جدا وبعد ما ادفنت ع طول قبل ما يقفلوا اذان المغرب اذن 

امي توفها الله هذا العام يوم الجمعه اول يوم عيد الاضحي قبل الجمعه في مني بعد اداء الحج و دفنت في مكة و صلي عليها يوم السبت في صلاة العشاء و نطقت الشهادة اكثر من مرة و صلت ركعتين قبل خروج الروح و قبلها كانت في عمرة رمضان و لما رجعت طلبت تطلع حج و قبل الحج كانت بتدعي الله ان تموت في الحج و تقبل الله منها و للعلم زوجتي عملت بوست بعدها لحماتها اللي هي امي تذكر فيه ما كانت تفعله امي حتي تكون خاتمتها جميله كدة و البوست انتشر علي النت و عمل مشاهده و شير عالي جدا و في الاخر لا نذكيها علي الله

خالتي الله يرحمها ماتت يوم وقفه العيد الصغير الي فات داخت ووقعت وهي مروحه من صلاه الجمعه والناس ساعدوها تروح البيت وماتت اول مادخلت البيت وصايمه رمضان كله ووزعت أذكار ومصاحف ف اخر تراويح وقبل ماتروح تصلي كانت خاتمه القرآن ربنا يرحمها ويغفر لها ويرزقنا حسن الخاتمه

امى الله يرحمها ويغفر لها وتجعلها رفيقه لسيدنا محمد صلى الله عليه وسلم قبل ماتموت بربع ساعة كانت فى غيبوبة قامت ولاكانها تعبانة وقرأت سورة الإخلاص وماتت ليلة الجمعة ودفنت يوم الجمعه اللهم اجمعنى بيها وجمعنا مع سيدنا محمد صلى الله عليه وسلم

جدى ابو ماما الله يرحمه مات وهو بيذكر ربنا وبيقول كلام حلو اوى عن الرسول واتشاهد وخالى الله يرحمه توفى فى حضرة ربنا يرحمهم ويرزقنا بحسن الخاتمه زيهم

والدي الله يرحمه كان عنده نزيف ف المخ وممنوع يتحرك قال لاخويا عاوزه اقوم استحمي وصمم كان قبل وفاته بيومين بالظبط وبعدها بيوم مبقاش حاسس باي حاجه حواليه غير الاذان كان دايما يردد الاذان ولما اكلمه مش حاسس بيا ولا سامعني واتوفي ليلة الجمعه وكنا ف اسيوط و اول ما دخلنا بيه قنا الفجر ادن ودخل مسجد سيدي عبد الرحيم واقاموا عليه صلاة الفجر

خالتي الله يرحمها ويغفر لها اخر اربعين يوم في حياتها كان بدايه غيبوبة قبل ما ننزلها للمستشفي قالت استنو اصلي الظهر في اول ركعة دخلت في غيبوبة وكل كام يوم نلاقيها كانها فاقت وبتصلي وتفقد الوعي تاني.... الله يرحمها كانت صوامةوقوامةربنايجمعنا بيها

هى مش حد هيا مراتى وحببتى واختى وكل حاجه حلوه ماتت وسابتنى انا وبنتى ٧سنين من غيرها الدنيا وحشه اوى اوقات كتير اوى بفتح الدولاب وبخد هدومها ف حضنى وبفضل اعيط لحد منام انا بعترف ان اتكسرت والله ادمرت كنت بحبها اوى وهفضل احبها وهتفضل عايشه جوايه وان شاء مش هتجوز ولا هخلى اى حد يهين بنتى انا معتش ليه غير بنتى دلوقتى وخسارتى ف مراتى مش هتتعوض ولابكنوز الدنيا دى كلها خسارتى فيها كبيره كبيره اوى ادعولها ربنا يرحمها ويصبرنى اناوبنتى يارب

ماما الله يغفر لها ماتت في العشرة الاواخر من رمضار ليلة 23 ليلة الجمعة غريبة مبطونة بالكبد وآخر ما دخل جوفها قبل الغيبوبة ماء زمزم وبلح مكة وقبل الغيبوبة باعت جزء من دهبها لتتصدق به وماتت والملبغ معي وتصدقت به بعد وفاتها 😢

شفت بالتلفزيون من اسبوعين تقريبا شهيد فلسطيني كان مصاب برصاص الاحتال و هو في المستشفى كانو بحاول يسعفوه كان ب يتلو و يرتل القرآن بصوت عالي جميل و توفي على القرآن 💔 الله يرحمه اكتر موته اثرت في انو و هو ب اشد وجعو كان يسمع قرآن 😢💔 الله يرحمه و يرحم موتى المسلمين جميعا

حمايا الله يرحمه الاربعين بتاعته بكرا مات يوم الجمعه صلى العصر 4 مرات كل مانساله بتعمل ايه يقول بصلى العصر وبعدها بشويه ابنه قاله يلى نروح للدكتور صلى تانى بيقوله بتصلى ايه يا ابويا قاله بصلى المغرب قاله المغرب لسه ما اذنش قاله يابنى انا صليته ياذن منين ما ياذن مفيش نص ساعه لبس وراح للدكتور مات مات والروح طلعت بعدها بربع ساعه اذن المغرب اللى كان مصليه قبل معاده قبل ماالروح تطلع

بابا كان بيتوضي ووقع دخل المستشفي بعدها بفتره مات قبل م يموت بيوم كان وشه ابيض اوي زي اللبن الحليب واتاخرت جنازته ممغسله وسلامه طلع اتدفن ف حضنه عيل صغنن مع أن كان قبله ناس كتير خرجت م مغسله الا بابا واتدفن معاه وف حضنه الله يرحمه

لسه من كام يوم واحد قريبنا كان دايما بيحفظ العيال الصغيرة القران وعمرة ما شاء الله معدى 90 كان صايم وبيحفظ العيال وبيقرا سورة الرحمن راح مميل راسه وتوكل على الله وهو بيقرا السورة .الله عليه فى دنيته واخرته ربنا يحسن خاتمتنا

بابا الله يرحمه كان وحشني اوي وكنت كل يوم ادعي ربنا يطمني عليه عنده وميأستش ابدا من الدعاء لحد ماجاني في الحلم في بيت على البحر كله زجاج وهو لابس ابيض وكان ساجد بيصلي والبحر اروع ما يمكن ازرق لون السماء وصافي تشوف الي جواها والرمله دهب وخلص صلاة وسلم عليا قولتله انت قاعد هنا سايبني قالي لا روح هناك لسه وعدنا انا هو من كرقه قصيره اوي وداني شقتنا بس صحيت مبسوطه اوي وفرحانه جدا الله يرحمه وينور قبره ويلحقنا بيه في الجنه ان شاء الله

ابويا كان مشرف على رسالة دكتوراة ولغاية الاخر لحظة كان بيشتغل علي الكمبيوتر وكان يوم جمعة كان طول اليوم عادي ومصلي الجمعة وبعد العشا قعد يشتغل في الرسالة وفي خمس دقايق فاضت روحة الطاهرة لخالقها ومالحقناش ناخدة المستشفى ادعولة بالرحمة والمغفرة والعتق من النار يااخواني واخواتي

امي توفت ليلة ٢٧ ف رمضان وصلينا عليها صلاة الجمعه ومسجد التوحيد كان كله مليان والناس كانت بتصلي برة المسجد من كترهم وقبل ماتتوفي نطقت الشهادتين وكانت مبتسمه قبل ماتتدفن وتوفيت بداء ف بطنها ربنا يرحمها يارب ويغفرلها ويسكنها الفردوس الاعلى ويصبرني ع فراقها

جدتي ماتت في 13 رمضان وجدي مات مبطون وصحبتي ماتت يوم اربعه رمضان وخال مامتي كان له مصحف مكتوب اسمه عليه كان بيختم القرءان كل شويه وكان لسه خاتمه ومات ف رمضان وهو صايم تعب فجاه وهو رايح الشغل الصبح قالوله اشرب قالهم انا صايم ومات ربنا يرحمهم ويحسن خاتمتنا

جدي حكى ذات مرة عن مؤذن في وقت سابق بعد أن رفع الأذان قال (السلام عليكم إخواني وإن شاء الله ألقاكم في الجنة) ثم نام بجوار المنبر وصعدت روحه إلى خالقها، وأثناء تشييع جنازته كانت الخشبة تقف عند كل مسجد تمر عليه☝سبحان الله العظيم

ابويا ربنا يكتبة في اعلي منزلة في الجنة ان شاء الله يوميها الصبح كان ابيض و جميل مع انة كان عندة سرطان و في المستشفي فقلتلة انت مالك حلو كدة لية علي بليل كان متوفي و قالولي انة قبل الوفاة فضل علي لسانة كلمة الله و مبقاش يتكلم و بيقول الله الله الله بس ربنا يرحمة و يحسن ختامة

ابني الله يرحمه اتوفي قبل عيد الأضحى ب10 ايام وكان عمره17 سنه وصلوا علية في المسجد النبوي وادفن في البقيع .والحمد لله هيفضل لحد قيام الساعة الحجاج والمعتمرين يزوروا أهل البقيع ويدعولهم. وربنا كان بيطلب من سيدنا محمد أن يخرج يزور أهل البقيع ويدعولهم. ربنا يرزقنا حسن الخاتمة يارب .

جدتي قبل ما تموت حضرت الملائكة وكتبوا علي اصابعها الله اكبر وهو الذكر الذي كانت تردده طول حياتها وقالت لي اقرئ كدا ايه الي مكتوب .. الله واضحة و رايت الهمزة علي الالف في اكبر واضحة وحرف الباء تحته نقطة واضحة 
جدي الله يرحمه صلي الفجر ف الجامع وجه عشان يروح ساعة الضهر تعب ومات بعدها وكل الي كان جاي يعزي يقول ده احنا سمعنا صوت عكازه الفجر وكنا بنستني كل يوم نسمعه وندعيله ربنا يقويه لان مبيشفش كويس وتعبان ومع ذلك مستحيل كان يسيب صلاه الفجر ف الجامع ربنا يجعل قبره روضه من رياض الجنه ويشفع فيه صلاه الفجر

18/4/2004يوم اشرق قلبي بولادتك يوم انرت عيوني بنور عينيك البريئتين..ااه ياولدي كم كانت فرحتي بقدومك ولكن فرحتنا لم تكتمل والحمدلله على كل حال فبعد مرور تسعة اشهر على مجيئك علمنا بمرضك بالقلب لم نستعظم الامر رغم وقوعه كالصاعقه علينا وحمدنا ربنا على كل حال ومنذ ذلك الوقت ابتدأت رحلة علاجك ويعلم الله يا حبيبي كم سعينا بذلك ولم نتذمر وبقينا لله حامدين شاكرين عشت طفولتك محروما من اللعب لعدم مقدرتك على ذلك ولم تتذمر كنت دائما تحمد الله وتقول الحمدلله انا احسن من غيري بكتير انا بمشي غيري ملوش رجلين.تمنيت ان تلعب وتركض وتمارس طفولتك ولكن المرض حرمك من طفولتك.كنت تخفي عني آلامك حتى لا ترى الحزن بعيوني وبرغم من ذلك كنت اشعر بك واسألك بداية تنكر ونهاية تخبرني بحجم الالم.حتى قبل يوم وفاتك وانت شبه غائب عن الوعي لم تتعرف على احد سواي وقلت (هاي امي الحنونه خلوها عندي)كان قلبي ينزف من الحزن عليك وكان وضعك بغاية الخطوره واخبرونا بخطورة العمليه.وارادة الله فوق كل شيئ وتمت عمليتك بنجاح اكرمني الله ببقائك بحضني ليله كاامله تحدثنا فيها واسمعتني حلو الكلام وفي اليوم المشؤوم جاء الدكتور قبل وفاتك بنصف ساعه اخبرني ان وضع القلب سليم تماما وكل شيئ على مايرام وغدا خروج حمدنا الله وكانت فرحتي لا توصف...بعدها بدقائق بتحكيلي(يما الجنه صيف ولا شتا بحكيلك الجنه اجمل من الربيع وفيها مالا يخطر عبالك.حكيتلي يما طمنتيني عشان بس اروح الجنه بحبش الشتا بضل امرض بالشتا والحمدلله) واحضرو وجبة الغدا واكلتها باصرار مني وبعدها بدقائق(يما انا شامم ريحه بتجنن شاميتها بحكيلك لا بتحكيلي يما شمي ريحه معبيه الغرفه غريبه بتجنن بحكيلك مش شامه)
نظرت الى يمينك وضحكت ضحكه ما رأيتها على وجهك بحياتك وكأن الله لجمني لسؤالك عن سبب الضحكه وكانت تمام الساعه الثالثه وربع عصرا في تاريخ 27/1/2018 سلمت روحك الى بارئها امام عيني بعد ان صرخت يماا.وكان اسود يوم بعمري لا اراكم الله مكروها بعزيز وضنا ....
في هذا اليوم اتممت 14 عاما يعلم الله بنبل اخلاقك ونفسك الشريفه محمود يا نور عيني عيد ميلادك بالجنه ياعمري رحمك الله رحمة واسعه وادخلك فسيح جنانك واعاننا الله على الم الفراق.وجمعنا معك بعليين يااارب اميين

صاحب ابت اختي وجارنا فنفس الوقت شاب ٢٢ سنه كل الي يشوفه يقول صايع ومش فالح ومش بتاع شغل وفيه وفيه برغم انه ثابت ع صلاته وجدع وبيخدم كل اللي حواليه الصغير قبل الكبير .بس عشان شاب فاكرينه زي اللي حواليه ..اتوفي الخميس اللي فات فحادثة وهو راجع من شغله قبل الفطار بساعه . ضابط امن دوله خبطه .. ميت صايم ..راجع من شغله فليله وتريه ..البلد كلها تقرييا صلت عليه ...ربنا يرزقنا حسن الخاتمة 💙💙

تيتا الله يرحمها ماتت وهي صايمه اخر يوم في الست البيض بتاع شوال وبعت ماصلت العصر قامت من علي المصليه عشان تنادي علي جدو يقوم يصلي وماتت الله يرحمها كانت طيبة جدااا والناس كلها تشهد باخلاقها العاليه ربنا يرحمها ويجمعني بيها في الجنه يارب 💔💔

جدي لامي مات وهوا بيقرا قران ومصلي الفجر وقال اذكار الصباح 
مات بعد الايه الَّذِينَ قَالُوا رَبُّنَا اللَّهُ ثُمَّ اسْتَقَامُوا تَتَنَزَّلُ عَلَيْهِمُ الْمَلَائِكَةُ أَلَّا تَخَافُوا وَلَا تَحْزَنُوا وَأَبْشِرُوا بِالْجَنَّةِ الَّتِي كُنتُمْ تُوعَدُونَ (30) نَحْنُ أَوْلِيَاؤُكُمْ فِي الْحَيَاةِ الدُّنْيَا وَفِي الْآخِرَةِ ۖ وَلَكُمْ فِيهَا مَا تَشْتَهِي أَنفُسُكُمْ وَلَكُمْ فِيهَا مَا تَدَّعُونَ (31) 
الله يرحمه ويغفر له ويبدل سيئاته حسنات بحق تعبه مع بناته وتربيته 

جدى ربنا يرحمه و يغفر له ... انا ماشوفتهوش لكن والدى حكالى عنه كتير قبل وفاته كان فاقد الادراك بكل اللى حواليه و مكانش بيعمل حاجة غير انه بيردد آيات القران .. و فى مرة قال لوالدى انه شايف صحابة رسول الله قدامه . ربنا يجعل قبره روضة من الجنة و يجعل القران شفيع ليه و يحشره مع الانبياء و الصالحين و يجمعنا بيه فى الجنة

معلمتى حكت لى عن امرأة من الخرطوم كانت فى مصر و كانت بتحفظ على ايد معلمتى القران اصيبت بالكانسر و هى بتحتضر قالت " اشهد ان لا اله الا الله و أن الواقف أمامى هذا محمد رسول الله " ... يارب يرزقنا حسن الخاتمة

جوز اختى ربنا يرحمه كان حاجة مش موجود منها إلا قليل اوى دلوقتى أخلاق وادب وتواضع ومعاملة وجبر خواطر لاى حد كبير صغير كان خريج ألسن المانى ومدرس مفيش طالب ولازميل ليه إلا وبكى عليه واللى سمع جه جنازته والباقى كل يوم ف البيت وكمية دعاء وشكر بسيرته .كان الدروس معظمها لله واللى قادر يجيب ومبيكسفش اى حد . اتوفى رمضان اللى فات وكان ع لاذان الفجر صابح وقفة العيد بدون ألم وكان ناوى يصوم وهيروح يصلى وهو واقف وماشى ف الشقة وقع أختى سمعت صوت دب خرجت لقيت ابنها 4 سنين بيقولها الحقى يا ماما وقع عدلته شهق شهقة خفيفة جدا والابتسامة ع لوشه وغسله وجنازته محسناش بيهم وكل اللى فيها بيحكوا عنها ماشاء الله والدفنة كانت الساعة6 الصبح بمنتهى السرعة وعدد الناس اللى فجنازته محصلش والجو كان كأن الربيع ومفيش شمس واختى يشاء ربنا إنها تكون حامل بعد اكتر من 4سنين تانى وفالشهر التانى يدوب كان فرحان بالخبر اووووى وده كان عوض من ربنا وحاجة تصبرنا اختى 28 سنةوهو 37 الله يرحه مهما أحكى فى تفاصيل كتيرة بس كل اللى اقدر أقوله بجد حسن حياة احسن خاتمة .ربنا يجعل مثواه الفردوس الأعلى 👐

بابا حبيبي مات وهو بيتوضا في الجامع في صلاة العصر وكان علي وشه إبتسامة مش ممكن انساها وماما الله يرحمها كانت مريضة كبد ماتت مبطونة في يوم الجمعة الساعة 3الصبح بعد منطقت الشهادة كذا مرة وآخر جملة قالتها قبل موتها علي طول لا خوف ولا فزع من لقاك يا رب ثم نطقت الشهادة وإتصلي عليها الجمعة الله يرحمهم ويغفر لهم ويجمعني بيهم علي خير يا رب

ألاء يحيى زوجة أخويا اللهم امتنا مثلها أخر كلامها لا اله الا الله محمد رسول الله وتوفت ليلة النصف من شعبان ونحسبها شهيدة وكانت جنازة مهيبة وكأنها زفت مرة اخرى بعد زفافها الذي لم يمر عليه سوي عام اللهم اجمعنا بها في أعالي الجنان وأنس وحشتها وافرش لها من فرش الجنة💔💔

اخويا كان مريض كانسر وكانت امنيته يطلع عمره وفعلا ربنا كتبهالو عمل عمرته ورجع الفندق جاتلو غيبوبه ودخل المستشفى قعد حوالى اسبوعين ودخل عليه رمضان كمل لحد ليله27واتوفى فيها واندفن فى البقيع بعد ماصلى عليه ملاين ليله 27وشال كفنه اربعه من اامه الحرم ويوم وفاته اتعمله تلات عمرات على روحو

جدي توفي وهو بيقرء ف المصحف هو اصلا كان عندو القلب فتعب فجاه وفضل يقرء افتكرها نوبه قلب وهتروح وفضل مكمل قراءه خالي شافو قالو انت تعبان تعالي نروح للدكتور قالو هي غزه ف قلبي وهتروح خليني اكمل السوره ومرضيش يسيب المصحف ومات وهو بيقرء 

بابا الله يرحمه كان دخل فى غيبوبه كبديه واتحجز فالرعاية المركزة فالمستشفي 18 يوم مكنش فوعيه كل ما نروح فمعاد الزيارة الممرضين والدكاترة يقولو هو امام مسجد نقولهم لاء يقولو اصله طول الوقت عمال يأذن ويقراء قرأن بالرغم انه مكنش مركز حتى انه يتعرف علينا ولا يكلمنا مجرد انه يبصلنا ويسكت بس الف رحمة عليه يارب ويارب نلحقه على خير ويحسن خاتمتنا جميعا امين يارب العالمين

ابن عمى الله يرحمه شاب خلوق جدا وكله بيشهد باخلاقه من وهو طفل وهو مريض لحد ما وصل سن 26 وهو مريض لازم الفراش مكنش بيفوت فرض ف عز مرضه كان يحبو ع السلم عشان يروح يصلى توفاه الله بعد عيد الاضحى وكان امتنع عن الاكل كانت جنازته زفه والليله اللى توفاه الله فيها كنت بحلم انه انه عريس وبينزف والله وكان بيقولى قولى لوالدتى انى عريس متزعليش الله يرحمه عمره ما اذى حد ولا قال كلمه ف حق حد وحشه الله يغفرله ويجعله من السبعه الذى بظلهم الله بعرشه اللهم امين 😢

كان واحد محترم وانا شغال معاه اسمه استاذ محمد ابراهيم الراجل ده كان يوم جمعة صحي بدري ظبط نفسه كأنه عريس وهو رايح يصلي لقي صحاب ابنه في الشارع ومعاهم ابنه يالا يابني انت وهو عشان الصلاة خلاص يتجمعوا ويروحوا معاه بعد كدة هو يقعد في الصف قدام ابنه بالظبط وفي اول رقعة الشيخ يقول ولا الضاااااالين آمييين فيها ربنا يقبض روحه ويموت علي كتف ابنه في صلاة الجمعة في اول ركعة اللهم ارزقنا حسن الخاتمة

بابا الله يرحمه كا ن مريض وبيغسل كلى واخر ايامة تعب قوى واتحجز فى المستشفى ومرة واحدة لقينا بابا بيقول وعليكم السلام ورحمة الله وبركاتة وبعد ذلك نطق الشهادة ومات احنا كلنا استغربا ولما سالنا قالوا ان هو رد السلام على الملاءكة التى قبضت روحه والحمد الله ربنا يجعله مع الانبياء والصديقين والشهداء

سيدى الحاج طلب الله يرحمه صلى الفجر إمام بينا فى المسجد ورجع البيت يريح خمس دقايق لحد ما النهار يطلع عشان يروح الغيط فريح ومقمش تانى ربنا يرحمه يارب صوته كان من اروع الأصوات فى البلد دا لو مكنش احسنهم♥️

اخويا كان مريض سرطان وتوفى بعد اداء العمره وصلو عاليه كبار المشايخ الحرم وغسلو ولبسو فوق الكفن عباية عريس وصلو عاليه ترويح ليلة ٢٧ رمضان الى فات وتعملو كذا عمره بعدها من ناس نعرفهاه ومنعرفهاش ربنا يجعلو فى الفردوس الاعلى باذن الله

جدتي ام بابا الله يرحمها ماتت ليله 27 رمضان و كانت متوضيه وبتشرب بق مايه علشان اذان الفجر وكان صابح الجمعه ناس كتير صليت عليها صلاه الجنازه واختها كانت بتعمل عمره رمضان طلبت من الامام انه يدعيله ف الحرم

كنت فى مسجد اسمه التوحيد امام وحدة اسعاف المساكن فى ش العشرين فيصل المسجد 3ادوار ارضى سيدات ووضوء والثانى مصلى رجال والخطيب والثالث مصلى 
وكانت صلاة الجمعه وتأخر الخطيب فطلبو من احد الجالسين ان يخطب فقام وصعد المنبر وبدء بالخطابة وكنت فى الدور الثالث لا اراه ثم فجأة سمعنا اه وسقوط مات الخطيب انزلوه الى وحدة الأسعاف ولكنه كان قد مات وعلمت بعد ذالك انه كان خطيب ومؤذن ولكنه توقف لسوء حالته الصحيه من عاش على شئ مات عليه 
سبحان الله يغيب الخطيب ويطلب للخطابة بعد انقطاع لترتقى روحه الى الله على المنبر اجله فى هذه الساعه ولكن الله بكرمه يمن عليه ان يرتقى من منزلة المصلى بالصفوف الأولى الى منزلة الخطيب 

عمتى كانت تعبانة وفضلت تردد سورة الصمد والناس والفلق وبعد ما فاقت من الالم طلعت من المستشفى قامت الصبح فطرت مع بنت ابنها ودخلت اتوضت وطلعت على السرير قالت الشهادة وماتت الله يرحمها كانت انسان جميلة بكل شى والاخوات اللى غسلوها قالوا بلاش حد يعيط بصوت وقالوا انها بتبتسم وهما بيوضوها

جدو الله يرحمه ويغفر له مات يوم 27 رمضان وهو صائم وكان يوم جمعة وهو توضأ لصلاه الجمعة وقال هريح شويه على ما الاذان يأذن وسمعت امى صوت قرأن يخرج من الراديو فى غرفته وقالت صوته كان جميل صوت لم اسمع مثله من قبل الف رحمه ونور عليه اللهم ارحم امواتنا واموات المسلمين وارزقنا حسن الخاتمة

جدي ام ماما توفي قبل ما ماما تتجوز ع جبل عرفات وهو بيحج وادفن هناك ❤❤ وخالتي توفت من 10 سنين ف السعوديه برضو ف مكه وادفنت ف البقيع عند نساء الرسول وجدتي ام ماما توفت من شهرين خالتي اعده معاها بس خالتي بتسيبها دايما وبتروح الشغل من 7 الصبح وترجع الساعه 4 العصر.. اليوم اللي جدتي توفت فيه كانت طبخه ومروقه الشقه واعده مستنيه خالتي اما تيجي من الشغل عشان ياكلوا سوا صلت العصر بس ملحقتش تاكل قالت لخالتي الحقيني وبعدين قالتلها دا طلوع روح واشاهدت وكل دا مكملش 5 دقايق سكرات الموت بتاعها خفيفه ..وكانت مش تعبانه ولا حاجه .الله يرحمهم ويرزقنا حسن الخاتمه باذن الله ❤

ابن عمي مات وهو بيصلي صلاة العشاء ف الجامع... مات ف الركعة الثانيه والمصلين كملوا صلاة وهو ساجد لله وبعدما أنهوا الصلاة عرفوا انه مات.. كانت جنازته بها سعادة لأنه مات ساجداً لله كنا نبكيه وف ذات الوقت نفرح له ونسأل الله لي ولكم حسن الخاتمه.... رحمة الله تعالى على امواتنا جميعا

بابا الله يرحمة مات وكان راجع من صلاه العشاء وكان كل مايصلي يكلم جيرانا وهو كان السبب انهم ينزلوا يصلوا ويومها بعد ماخلص صلاه قعد يواصيهم علي الصلاه وتعب طلع مات لوحدة ومكنش فيه اي حاجة ربنا يرحموا ويرحمنا ويرحم امواتنا جميعا ويرزقنا حسن الخاتمة الفاتحة علي روحهم جميعا

جدى الله يرحمه توفى فى عز الصيف وكان وروحه بتخرج عطشان وماكناش عارفين نسقيه الميه كل ما نحاول مايقدرش يتنفس ويتعب اكتر ومجرد ماروحه طلعت السما مطرت مع انه مش اوان مطر ولا حاجه ربنا روااه فى الجنه يارب ونعيمها 💗 :(

جدتي الله يرحمها ويغفر ليها هيا كان قلبها حاسس انها هتموت راحت من شهر لكل الناس الي تعرفهم و بتقول لأي حد اعفيلي لو غلط في حقك و سامحوني و كدا بس هيا مكانتش بتشتكي من اي حاجه غير أن ايدها واجعاها و خالي في يوم 7 رمضان السنه قبل الي فاتت قالها تعالي اثبتلك ان ايدك دي مفهاش اي حاجه بس انتي عايزه تدلعي شويه بالهزار كدا و خدها الدكتور و هيا كويسه جدااا و كانت صايمه عادي فطرت بزبادي و طلبت تفاح كان نفسها فيه و راحت الدكتور قال عندها ضعف في القلب و متعبنش بس نامت كان وشها ندي اوووي وشكلها جمييل كأنها رجعت 10 سنين لورا شعرها نزل على جبهتها ونسدل و كان ناعم جدا وهيا نايمه وهيا مبتسمه و ماتت على كدا مفيش دليل انها ماتت غير أن الأجهزه وقفت صلو جنازتها اكتر من 40 صف الناس جولها من كل مكان في البلد وفي ناس من بره و كل الناس ذكروها بحسن الصفات الله يرحمك و يغفر ليكي و يجعل مثواكي الجنه يا جدتي ممكن دعوه ليها

بابا الله يرحمه صلي الفجر وقعد للشروق يسبح ويقرا قران ومات وهوا فاتح المصحف علي اول سورة السجده ماما دخلت عليه لقيته متني لادام لعله كان ساجد علي اول سجدة ف السورة لانه كابيصلي وهوا قاعد ومتوفي في شروق يوم الجمعه ووقت صلاة الفجر اتصل بيا ودعالي دعا كتييييير وقعد يكلمني ويقولي انتي اللي طلعت بيها من الدنيا ودعالي بسداد ديني وصلاح حالي وحال ولادي ودعالي بالستر والصحه ودي كانت اخر مكالمه بيني وبينه الحمد لله انه اختارني انا اخر واحده يكلمها ويدعيلها

ابن خالتى عنده ٣٠سنه توفى اول رمضان ده كان لسه مصلى الفجر وصايم ونازل على شغل وكان مكلمنا وقالنا جايلكم فى نص رمضان وفعلا جه بس ميت. كان برة مصر وجنازته مع ان كل عرفت قبلها بساعه بس كان جنازة لا تحكى وكنا مصلين عليه الفجر وكان مسجد مليان ستات كتير ورجالة والباقي بيصلو برة مسجد من كتر العدد . ماشاء الله .ربنا يرحمك يا هشام ويجعلك من اهل الفردوس يارب.

والدتي الله يرحمها انا وحيدها وطول عمرها تقول كان نفسي ربنا يرزقني ببنت ..... لما اتوفت واحنا رايحين ندفنها ربنا رزقها ببنتين اتولدوا واتوفوا واتدفنوا معاها في نفس التربة .... ساعتها انا عيط عياط هيستيري من الحزن والفرحه ليها

جدتى الله يرحمها اسرع طلوع روح شوفته فى حياتى دقايق معدوده زى كاننا بنتفرج على لقطة مرت سريعا مكانتش بتسيب فرض حتى ممكن كانت تنسي وتصلى الفرض مرتين قالت الشهادة وكلام كتيير مدح الرسول وفرحانة وريحة جابهتها بعد الموت والمكان كان مسك وحاجات كتير اوى الله يرحمها يا رب

أبي رحمه الله، مات في صباح يوم 26 رمضان (في مثل هذا اليوم الذي نحن فيه، فاليوم ذكرى وفاته)، وقبل موته بأيام رأى رسول الله صلى الله عليه وسلم في المنام، وقبل الوفاة بساعات اغتسل بماء زمزم غسلًا كاملًا وهو حيّ، ثم مات على طهارته هذه... رحمك الله يا أبي 💔

أختي توفت في حالة النفاس وهي في الغربه وفي أول ليله وتريه وشهد اغلب الناس انها ليلة القدر وهما بيغسلوها بالرغم من إنها كانت في غيبوبه إلا أنها كانت رافعه السبابه بالشهادة وكانت مبتسمه أثناء الغسل 

والدى طول عمره لازم يصلى كل الفروض فالجامع يصحى الفجر يصلى فالجامع ويروح على شغله يرجع من شغله يصلى العصر فالجامع يروح يتغدى يرجع على صلاه المغرب للجامع ويقعد لغايه العشا ويرجع يقرأ قراءن ويقعد معانا شويه وينام وسبحان الله لما مات الخشبه مردتش تتحرك من الجامع من العصر لغايه العشا زى ما كان متعود ساعتها امام الجامع قال عشان هو مكنش بيسيب فرض الله يرحمه ويغفر له

وامي تاهت عن كل شئ في اخر يوم لها ولا تذكر شئ الا الصلاة نجدها تتوضئ وترفع يدها وتكبر وتدخل في الصلاة وتتمم الصلاة واسبح وتدعوا الله 
وبتكلم معها بقول لها ماما قولي لا إله الا الله ردت وقالت 
( لا إله إلا الله سيدنا محمد رسول الله رضيت بالله رب وبالاسلام دينا وبسيدنا محمد صل الله عليه وسلم نبيا ورسولا ثم قالت لي كده كويس 
قلتها ياااا كده جميل اوي 
ووصتني اتصدق بنقودها لادار ايتام وبملابسها للمحتاجين 
واخره حاجة قالت اعملوا خير تلاقوا خير وقالت يارب اني بريئه من كل ما هو يخالف ملة الاسلام 

بابا الله يرحمه يدوبك صلو عليه فالجامع ووشالو النعش والنعش جري بسرعه تعجب لها الجميع اللي شايلين النعش ملحقوش يلبسو جزمهم من على باب الجامع وطلعم جري بالنعش لدرجة اللى كان بيقف قدام النعش عشان يوقفه عشان الناس تلحق الجنازه كانو بيزقوه ومبيستنوش حد والشباب اللي شايله كان بيشدو فالنعش عشان يهدي شويه مكنوش بيقدرو خالص وموقفش فعلا الا قدام القبر بالظبط حبيبي كان طاير للقاء ربه لراحة الاخره اللهم ابدله دارا خيرا من دره واهلا خيرا من اهلا وارزقه اللهم الفردوس الاعلى

حمايا الله يرحمه ....كان على جهاز تنفس صناعى وكان بيتمتم بالقران .وهوه غايب عن الوعى ...وكانوا يقروا قرأن جنبه ولما تيجى اخر كلمه فى الصفحه يضم صوابعه ويحركها كأنه بيقلب الصفحه ولما تيجى ايه فيها سجده يهم براسه كأنه عايز يقوم يسجد ..كل ده وهوه فاقد الوعى

توفي يوم الجمعه ف وقت صلاه الجمعه اتوضي وسلم على الناس كلها ف الشارع وهو بيسخن العربيه وراح المسجد بالعربيه و أثناء الخطبه حس انه تعبان رجع البيت مشي قعد يرجع يرجع ف ماما بتقوله مالك قالها دايخ قالتله اقعد ع الكرسي طيب قالها لا هفرد ف السرير... خمس دقائق وسمعت شخاره الموت ندهت عليا كنت نايمه الحقي بابا مش عارفه فيه ايه نزلت جري الشقه اللي تحت لاقيته خلاص بيطلع ف الروح ولقتنه الشهاده الحمد لله ❤️

.صاحبتى عبير الله يرحمها كانت تختم القران كل 3 ايام ومتفوتش صلاة وكانت فيها حته حاجه كدا بس اتعلمتها منها وبقيت أعملها كانت دايمن تحب تستر البنات يعنى كنا شغلين فى مستشفى ولو حد كلمها عن بنت متسكتش وتفضل تشكر فى اللبنت وتمشى فى الموضوع لحد ما تجوز البت بجد جوزت كذا بنت من اصحابها ومن اللى شغالين معانا كانت برضه ليه موقف لو حد سرق متفضحهوش تستر عليه لو حتحط من معاها تقولى الستر للناس اهم حاجه علشان ربنا يسترنا الله يرحمها ويسامحها يارب

أبي رحمة الله عليه كان امام وخطيب اكبر مسجد في قريتنا ثاني يوم رمضان من ٣ أعوام صلى بالناس التراويح واستسمحهم انه هيخفف رأفة به وبكبار السن ورجع البيت حس بوجع في صدره وهو بيتكلم مع أمي وزوجة اخي روحه خرجت بمنتهى السهولة... رحمة الله عليك يا أبي طبت حيا وميتا
بابا صلي الفجر ولما جه امر ربنا الصبح رفع علامة التوحيد وشرب ميه قبل مايتشاهد حبيبي ربنا يرحمه ويجعل مثواه الجنه وكانت صلاة الجنازة مليانة ناس مع انها كانت بعد صلاة العصر ومحدش عرف بوفاته غير واحنا نازلين نصلي عليه وكان ف الرعاية كل همه عايز مصحف يقرا فيه بس مكانش ينفع

بابا مات على ايدى فجأة الساعة 6 الصبح مسك بطنه وصحانا وبدل ما يصرخ وكدة لاء بقي بيقرا قرآن وأسماء الله الحسنى ونطق الشهادة والاحلى من ده كله انه مات مبطون لاء وكمان صايم وعينه كانت فى عينى انا وقالى انا بموت توفى بظبط فى اقل من 3 دقايق اللى يجى عينه عالكومنت يدعيله فضلاً وكرماً ❤️

خالي الحبيب عبدالفتاح راح يعمل عمرة وبعد انتهاء المناسك في اول يوم في رمضان ده وقبل الفطار كان صايم و راح يحلق ويصلي العصر ووهو راجع الفندق جاله سكتة قلبية مع انه ماكانش بيتعالج من حاجة وتوفي في لباس الاحرام.. احنا فضلنا ٥ ايام مش عارفين عنه حاجة ونتصل على موبايله فضل اول يومين يرن وماحدش يرد ، اتاريهم في المستشفى وضعوه في الثلاجة بموبايله بحاجته ومافكروش يبلغوا حد من الفوج معاه رغم انه كان معلق بياناته ولا حتى يردوا على موبايله اللي مابطلش رن واحنا عشنا ٥ ايام في قلق بالغ مش عارفين عنه حاجة..

وعمي دكتور محمود رسلان مات وعلي رجليه مصحف وكان رايح عمله واصلا كان ف اجازة بس كانت حالة طارئة وقال يدي الواجب اللي عليه اتقلب المكروباص وكل اللي فيه اتحرق الا عمي مات وجسمه سليم وعلي رجله مصحفه لم يمسسه الحريق فسبحان الله

ابنى هشام مات من 3سنينوبعد ماجة من صلاة الجمعة بساعة فجءة قعد يبوس فية وفى ابوة ووطى على رجلايا الاتنين يبوس فيهم ويحضنى ويبوسنى وينزلل تانى يوطى على رجلى الاتنين يبوسهم وبعدين الى عملة معايا طلع برة عملو مع ابوة ونقولة فية اية ياهشام يقولنا بحبكم ومش عاوزكم تزعلو منى نقولة هوانت ياحبيبي عملت حاجة يقول تنا بحبكم بحبكم قوى ومش عاوكم تزعل منى يلا سلام مع السلامة انا ماشى حضرى العداء ياماما ساعة وراجع وبعد الساعة جالنا انو غرق فى البحر ومرجعشى تانى ومكنش يعرف ولت حنا نعرف انو كان بيودعنا ومكناش عرفين وخفيف خفيف غرق فى البحر ومطلعينو تانى يوم الصبح ومن البحر على الاسسعاف ومنها للمستفى وومنها للمغسلة ومنها للجامع للصلاة عليةومن الجامع للترب ولمثواة اللاخير ومدخلسى البيت تانى اللة يرحمة للسنةا التالتة من 5/6/2015 لغايةانهارد ة 5/6/2018يعنى 3سنين عدو على ابنى فى لمح البصر وكان 16سنة وناجح فى اولى ثانوى بامتياز ومات بعد نجاحة بشهر وربنا يعوض عليك يابنى شبابك فة اﻻجنة

امى وقعت وهى بتصلى العشاء وبتقراء قران رحنا بيها المستشفى قاعده اسبوع فى العنايه المركزة وكل ما تفوف تقول انا مصليه العشاء وقرايه القران وجه ليها بشاره ان ابوها جالها وعطها برتقال من الجنه وتأخذ وتاكل وتقول الله حلو وتنادى عليه وتقولى خدى الكبس من جدك الف رحمه ونور عليها وهى مات فى يوم جمعه وابى مات وهو رايحه يتوضاء العشاء ووقع على الارض وكان اول يوم فى عيد الاضحى

والدى الله يرحمه ليله وفاته كان فى المستشفى وراحت عليه صلاة العشاء اول ما رجع البيت كان فعليا دخل فى سكرات الموت وصمم ان اخويا يحميه عشان عايز يصلى وكل شويه يروح فى غيبوبه ويرجع تانى حد مانفزله اخويا طلبه وبعد ماكبر للصلاه فقدالوعى ومات على طول رحمة الله عليه

جدتي الله يرحمها يوم وفاتها الصبح قالت لبنتها الساعة كام قالتلها 5 بعد ساعة قالتلها الساعة كام قالتلها الساعة 6-ايه يا امي عندك ميعاد بهزار قالتلها اه معايا معياد مع حبيبي وحلمت قبلها بيوم ان بتشتري سمك فبتقوله بكام قالهاب 14 بس مش مستهله يا حجة متخديش منه وسبته فعلا وصحت من النوم تقول مش مستهله مش مستهله وروحها خرجت ف سلام رهيب قالت عايزة اتوضي وقعدت وشربت بوق شاي وماتت عرقانه ف حضن امي بهدووء وكانت ف الغسل اللهم بارك كلها كرمات وبيضاااااا وقمر كانها نايمة ربنا يرحمها يارب وينور قبرها

اختي الله يرحمها15سنه كان عندها كانسر وكانت في معهد الاورام ويوم متوفت والدي كان عندها فقالت لوالدتي خلي بابا يروح لانه بكرة هيتعب اوي قالتلها ماهو معانا اهو يا سلوي قالتلها اسمعي الكلام يا ماما وفعلا والدي روح اخدت ماما بالحضن جامد اوي وفضلت تقولها سامحيني يا ماما علي اي حاجة زعلتك فيها وعلي كل التعب الي تعبتي معايا وبعدها قالتلها انا عايزة اتوضي واصلي العصر علما بانها كانت الساعه اتنين بالليل قالتها انتي صليتي يا سلوي كل الفروض قالتلها هتوضي وخلاص اتوضت وقالت لماما اقري معايا قران وبعز مخلصت قراءه جت علي اخر ايه في اية الكرسي وتوفت. الله يرحمك يا نور عيني كنتي اختي وبنتي وصاحبتي ربنا يجمعني بيكي في الجنة يارب

ماما ساعه وافتها كان جسمها كله سايب مابتتحكمش ف اي حاجه من جسمها مره واحده بصت لفوق وفضلت تحرك ايديها الاتنين وتقول دخلوني تقريبا اعتقادي شافت مكانها في الجنه وماتت وأقسم بالله دكتور الإسعاف قالي الخبر الساعه 1.30 الضهر الساعه 5 الا تلت كنت طالعه من المقابر بعد دفنها كانت كل حاجه متسهله غير أنها ماتت ف رمضان .. ربنا يراضيني واموت زيها لعل وعسي ربنا يجمعني بيها ف الجنه

خالتو الله يرحمها يارب ماتت تانى يوم رمضان وماشاء الله كانت مبتسمة ربنا يصبرنا على فراقها يارب 
وحمايا ربنا يرحمه ويجعله من أهل الجنة نزل الجامع لصلاة الجمعة وأول ماطلع البيت توفى ....وجدتى الله يرحمها ماتت مبطونة وشوفتها بعد دفنتها فى الحلم اطفال بيفرشوا ليها الأرض زرع وماسكين ايديها وبيقولوا جنة رضوان

الحمد لله والدى مات يوم 10 رمضان 2005 وكان يوم الجمعة وبعد الصلاة قعد مع والدتى بيتكلموا وفجأة راسه مالت حسبته نايم بتهزه ما قام ووندهت على الجيران وجابوا الدكتور وعرف انه توفى وجه امام المسجد وقال ده لسه مدينى زكاة رمضان و مطلع صدقة مع ان والدى كان بيفضل انه يخرجها اخر رمضان والكل كان بيقول ده مكانش تعبان واللى يقول ده لسه مسلم على واتاخر الدفن لظروف الصيام لبعد صلاة التراويح وبالرغم من اننا فى قرية الا ان الكل خرج بالكشافات وجوزى كان بيقول لى كانت الجنازة كانها بالنهار والجوامع كلها بعد التراويح خرجت للدفنة وكان العدد كبير والحمد لله ابويا كان بيشهد له بالاخلاق الحسنة وربنا يغفر له ويرحمه وينور قبره

جدي رحمة الله عليه مات وعلى صدره المصحف فيه سورة يس كان يقرأها.
جد جدتي والدة أمي مات وهو على فراش المرض وكانت الجمعة فكان لا يستطيع إلا الصلاة بأصابعه وعينيه ومات يوم الجمعة.
والدة جدتي رحمها الله كانت تنتوي الذهاب للحج وكانت تشتاق إليه فجهزت نفسها ولكنها ماتت قبل أن تحج ففتحوا قبرها ليسمعوا تلبية الحجيج قوية.
جدتي يرحمها الله ماتت يوم 19 أكتوبر 2005 15 رمضان وعند دخول نعشها قام كل الرجال من مقامهم على المقاهي وفي الطرقات ليصلوا عليها وكانت قد عانت من انتشار السرطان في سائر جسمها رحمة الله عليها وهي تأتيني في مناماتي وتبشرني بشارات تتحقق بالفعل.

عمتى طول رمضان كانت بتعمل مائده فطار للعمال بتوعها وفى اخر رمضان عملت فطار وفطرت ناس واطمنت عليهم وقالت هصلى المغرب الاول وافطر ودخلت تصلى ماتت وهيا بتصلى ربنا يرحمها ويغفرلها .وعمى بردوا مات يوم ٢٧ من رمضان كان متعود يقف فى طريق يوزع ميا وتمر وشربات على ناس قبل فطار وربنا توفاه فى صلاه الفجر

حببتى هبه هبه كانت فى حلقة تحفيظ وتسميع لبنات من جميع انحاء العالم هبه كانت من ضمن معلمات تدبر الاشهر جمعيه على مستوى العالم هبه اثناء التسميع لاحدى مسلمات الغرب احست بانها تفارق الحياه اعدت لنفسها مكانا من الاستراحه حتى ذهبت روحها بسلام وهى جالسه وباذناها سمعات وميكرفون بفمها والاخوات على النت هم من اتصلوا على اخواتها واخبروهم هبه طلع لها قافله من مكه فور موتها لعمل عمره لها هبه كل يوم بيتعملها عمره

خالي كان إمام مسجد يوم الجمعه راح قال الخطبه وصلي بالناس وركب الموتوسيكل بتاعه وروح والدنيا كانت بتشتي جامد وهو ماشي ف الطريق صحابه معاهم عربيه ملاكي قابلوه وقالولوه إركن الموتوسيكل هنا وتعالا نروحك الدنيا تشتي قالهم انتوا عاوزين تحرموني من ثواب مشي ف الشتا وانا مروح من المسجد للبيت ومرضاش يركب معاهم ووصل لحد العماره وركن الموتوسيكل بتاعه ف المدخل ووقع مات ع طول ...إدعوله بالرحمه والمغفره

اقسم بالله امي قبل ما تموت بصيت للسقف بقولها انتي شايفه ايه قالتلي طبق مدور وشدوني لفوق .. لحظة الاحتضار طلبت السبحة في المستشفي واخر كلامها لسان بيهلل بلا إله إلا الله .. طول عمرها كانت من الصابرين.. الله يرحمك يا اغلي انسانة علي قلبي وحشتيني قوي

امى رحمة الله عليها طول حياتها عمرة وحج وكان نفسها تدفن فى البقيع كل ما تروح تدعى لنفسها بكدا سافرت تحج لباباها ربنا توفاها اول ما وصلت بس ادفنت فى مكة وصلوا عليها فى الحرم المكى ربنا يرحمها حبيبتى وحشتنى اوى ويجمعنى بها فى الجنة ان شاء الله ويصبر قلبى على فراقها

بابا حبيبي صلي العشاء ونام نص ساعه حس انه تعبان قال لماما شغلي القران ف الراديو قعد يقول باارب اشفيني الحمد لله يااااارب وقعد يكرر فيهم كتير وصوته يعلي وهو يقول الحمد لله يااااارب وتوفي وهو بيتشاهد علي نفسه بابا توفي بعد العشاء بساعه الصبح وشه كانً منور اوي كل اللي يدخل يشوفه يقول ما شاء الله ربنا يرحمه ويغفرله ويجعل مثواه الجنه وربنا يصبرنا ع فراقه

امي توفت من سنتين يوم ٢٦ رمضان وكان يوم جمعة وكانت صائمة وراجعة من المسجد وجهزت نفسها للاعتكاف من بعد المغرب ولكن شاء رب العالمين انها تنتقل الى جواره ومصحفها في ايدها بتراجع حفظ سورة المائدة عشان عندها تسميع ... 
يعني صايمة و بتحفظ قرآن و يوم جمعة في العشر الأواخر من رمضان وناوية اعتكاف 
اللهم ارزقها الجنة بلا حساب ولا سابق عذاب

والدي رحمة الله عليه كان آخر عهده الصلاه والذكر دائما وعندما كان يحتضر كان يصحح القراءه لمن تواجدوا لقراءة سورة ياسين.. وزوجي الله يرحمه صلي الفجر ثم انقلبت به السياره ومات غريبا ورجع بلده في تابوت

بابا الله يرحمه قال الشهاده قبل ما يموت بيوم ولسانة منطقش حاجة بعدها ونام وصحى وهو ف سكرات الموت وكانت خفيفة عليه اكن حد بياخد. نفسه وكان رافع السبابه ف الغسل وجسمه ابيض ووشه راق حتى المغسلين قالو دا راجل صالح نحسبة من الشهداء ربنا يرحمه رحمة واسعة مات ليلة النصف من شعبان بعد معاناه من المرض بدون ما يشتكى بيحس بأى ربنا يرحمك يا حبيبي يارب العالمين 😭😭😭

ماما اخر حاجه كانت مصرة تقوم تتوضي عشان تصلي وهي كانت تعبانة وزهايمر ومش بتصلي الله يرحمها واخر شهر كاملا كانه لما تكون فايقة مش في غيبوبة كانت كلها ذكر وقرأن وتهليل وتكبير ولا اله الا الله كتيييييييير..وافتكر كمان انها اكلت الكيك اللي ميرات اخويا عملته عشان كانت عملاه بنية حاجه ماما بتحبها ..وماما اكلته ومرجعتوش زي اي حاجه وحمدت ربنا ورفضت تاخد الدوا ونامت ....😟وبس نامت وصحيتها مصحيتش...الله يرحمها ويغفر لها وينور قبرها ويرزقها الجنة

شيخ مسجدنا عليه رحمة الله كان المسؤل عن المسجد والإمام كان دائما يدعو الله ان يموت علي باب المسجد وفعلا والله قعد في المسجد من العصر حتي العشاء وبعد أن ام الناس للعشاء وصلي وهو خارج من المسجد مات علي بابه بعد أن قفل المسجد 
مات وكان وجه ابيض كالبدر والابتسامه تملأ وجهه الكريم 
الله يرحم شيخنا الشيخ محمد حسين

بابا الله يرحمه كان عنده كانسر وكان علطول يقرا قران في سره بقوله انت بتقول ايه قالي انت بختم القران بقوله انت حافظ القران قالي كله الحمد لله وجه الشقه عندي وبات كانه كان بيودعني واخر مره قالي وظبي علي الصلاه وقام اتوضي وصلي بعدها تعب ودخل المستشفي ومنع الاكل والشرب وكل حاجه بس عنيه كانت علطول تقول يارب الله يرحمك يا احن بابا وحشتني اوي اوي

والدي عليه رحمه الله كلم صاحبه امام مسجد وقاله انا كنت خايف اموت امبارح كان عليا دين ل ربنا لكن انهارده انا مستعد لو مت انت اللي تغسلني
بعد ساعه تقريباً قعدت انا وهو لواحدنا علي امل أنه يذاكر لي كالعاده لقيت جبهته بتعرق جدا وعمال ينام ويقوم ويقولي روحي بتطلع وانا كنت عماله امسح العرق ومش عارفه انه بيحتضر لان كنت صغيره ف صحيت امي ونزل راح المستشفي وهو بيردد الشهاده وتوفي بعد دخوله المستشفي ب ساعه .
كنا في شهر 3 الدنيا مطرت والنور قطع لحظه وصول جثمان بابا البيت
الغسل طبعا ماشوفتهووش لكن كل اللي كانوا وافقين حلفوا ان علامه الصلاه كانت منوره وشه وانه كان مستبشر .
يوم العزاء بليل خالي كان داخل ينام لقي بابا جاي بلبس الاحرام وبيقوله تعالي اعمل عمره معايا لانه كان مقدم علي عمره وملحقش يروح .
وانا كنت كل يوم الفجر اصحي علي صوت بابا وهو بيقرأ اواخر سوره البقره زي ما كان بيقرأها وهو عايش . 😭

زوجى توفى فى المستشفي ليلة الجمعه وهو ينطق الشهاده وجبهته تتعرق وصلى عليه الجمعه ويومها كان الجو بيمطر مطره شديده وجنازته كانت كبيره جدااا وكل اللى مشيوا في جنازته كانوا يذكرونه بالخير وانه من اهل الخير ..ربنا يرحمه ويلحقنى به فى الجنه

انا امى كانت عارفه أنها بتموت وقالت لاختى انا ماشيه للدنيا الواسعه اختى ردت وقالت اجى معاكى ي ماما قالتلها لاااا مينفعش وسكتت وسرحت ونامت وقامت لقت قريبنا قاعدين قالتلهم انتم جاين تودعونى علشان انا حموت وعيطت والكل بكى امى مكنتش بتعرف تقعد كان لازم احنا ال نقومها ونسندها علشان تقعد فجاه لقناها بتقوم لوحدها وبتلبس لوحدها وده كان مستحيل وقالتلنا ودونى المستشفى دلوقتي طب ليه ي ماما قالت دلوقتي وقامت لوحدها وودناها فعلا اكلت وشربت فالمستشفى وطلبت ميه وراحت قالت أشهد أن لا إله إلا الله وأن محمدا عبده ورسوله رغم أن امى مكنش تعرف تقراء كانت اميه وطيبه وغلباااانه يعنى أساسا متعرفش تقول ان محمد عبده ورسوله بس قالتها الحمد لله يارب وماتت واحنا قلوبنا ماتت معاها يا حببتى يا امى 😢 😢 الله يرحمك يا غاليه

معرفش الموته دي حلوه ولا وحشه عمي كان راجل كبير وديما مبيسيبش صلاه ابدا ولما كان بيصلي الفجر في المسجد وهو بيتوضي وقع وتوفاه الله في المسجد واخدوه البيت وجابوا طبيب قال توفي خلاص الله يرحمه كنت صغيره قوي بس منساش الحكايه

بابا قفل المصحف ومات وصاحبتى ماتت تامن يوم فى رمضان وهى صايمه وكانت ليله جمعه ونزلناها القبر والمغرب بيأذن وفطرنا على قبرها ربنا يحسن خاتمتنا

واحد قريبى كان فى غيبوبه وماشاء الله مبطلش قرآن وذكر الله إلى أن توفاه الله ..ربنا يرحمه برحمته التى وسعت كل شيء

جدتى وجدى طول عمرهم يدعوا يارب يومنا يكون واحد
جدتى رحمه الله عليها كانت مريضه لسنين كتير وصابره وفى يوم تعبت اوى ودخلت المستشفى وتوفاها الله بعدها بيوم اذان العصر 
جدى بقى الله يرحمه مكنش تعبان الا يوم الوفاه فجأه دخل فى غيبوبه الصبح فمعرفش أن جدتى توفت العصر وتوفاه الله هو المغرب ... واتدفنوا الاتنين فى صلاه الجمعه وجنازتهم كانت زى زفه جديده ليهم ربنا يرحمهم 
اكيد عملوا حاجه حلوة فى حياتهم عشان ربنا يقبل دعوتهم ويتوفاهم فى نفس اليوم ومحدش فيهم حس بفراق التانى

جدتى الله يرحمها كانت فى غيبوبه وهى بتحتضر خالتى وماما بيعيطو بتقولهم بتعيطو ليه الموت مكبه من دهب وقبل ماتموت بقت تردد الله ربى والإسلام دينى ومحمد رسولى ولقنت الشهاده لنفسها من غير ماحد يقولهالها وكان وشها ابيض زاى البدر ربنا يرحمها ويغفر لها ويسكنها الفردوس الأعلى

امى الله يرحمها كانت مريضه جدا وفى المستشفى ومش بتتحرك فجاه قامت لدرجه انى فكرتها خفت واستحمت واتوضت وصلت وسلمت على كل الناس ونامت على جمبها وغمضت عنيها ودمعت وعرقت واتشاهدت ودعتلى قبلها بكام ساعه ودعائها استجاب وماتت وغسلناها ودفناها يوم جمعه فى صلاة الجمعه ورجعنا اتسحرنا وصومنا لاول يوم رمضان دخلت قبرها فى رحمه من الله يرفع العذاب عن اهل القبور فى رمضان داخله قبرها راحه الله يرحمها 😢😢😢😢

زوجي الله يرحمه توفاه الله قبل ما يكمل 30سنه وابتلاه بسرطان دماغ نوع نادر فجأه احسبه ع خير ولا اذكيه ع الله كان من الصابرين الحامدين ودخل غيبوبه وصحي منها قبل الفجر وصلي الفجر ودخل غيبوبه تاني وتوفاه الله

خالى كان رايح اسكندريه بواحد غلبان بيشتغل عندهم يكشف عليه ويعمله تحاليل وهم راجعين فى الطريق وقف صلى صلاه جنازه والعصر وكان صايم فى اليوم ده وكان بيقرى قران وحصلهم حادثه عند كفر الدوار فربنا رزقه الموت وهو صايم وتالى للقران والمصحف كان مفتوح لقوه جنبه

زوجي الله يرحمه اول مره يسافر السعوديه للعمل واخر رمضان فحياته عمل عمره وختم القران اكتر من مره وقبل وفاته بشهر ونص كان حاجج بيت ربنا ولما عمل الحادثه فالسعوديه كان راجع من شغله ورايح يجيب لعبه لولادي السياره اتقلبت بيه كتير اخر حاجه قلها لصاحبه لا اله الا الله محمد رسول الله 
وقله ماتقلقش وابتسم وقعد اسبوع بعدها فالمستشفى غيبوبه وتوفي يوم الجمعه ودفن فالسعوديه علي طريق مكه
الله يرحمه سادس سنه من غيره ربي يجمعني به في الفردوس الأعلى ربي يرزقه منزله الشهداء

أبى مات وهو يصلى فى المسجد كان يوم جمعه وكان بيصلى صلاة العصر وكان يوم 9عاشوره وهو بيصلى وقع فى الارض رفع عينه فى السماء ورفع صوبعه واتشاهد على نفسه ونزل ايده ومات وكان مكاننا قبل وفاته بعشر دقايق واخر كلامه معايه روحى الله يسترك الف رحمه ونور عليك يا حبيبى

امى الله يرحمها توفت ف العشر اواخر من رمضان وكنت داخله اشوفها وانا منهاره ولما لقيت وشها اللى بيضحك ومنور اعدت اضحك من الفرحه للى هى وصلتلو من حسن الخاتمه

بابا كان في شبه غيبوبه سورة الكهف كانت شغاله ف الراديو الشيخ غلط ف ايه بابا قام صححها واخويا قاله سورة ايه دى ي بابا قاله اسم السوره ورقم الايه وتيمم  😢😢ونام مصحيش رحمته الله عليه وجعله من اهل الجنه

بابا الله يرحمه مريض كبد ودخل في غيبوبه اربع ايام ومكنش بيتحرك خالص غيبوبه من الدرجه الرابعه وجه قبل وفاته في بيوم رفع صباعه علي التوحيد ووقت خروج روحه لقيته بيضحك وبيتهز اوي افتكرته فاق من الغيبوبه وفرحت لحد مالقيت مرات عمي بتقولي دي روحه خرجت خلاص موقف صعب بس اطمنت عليه من ضحكته ومات مبتسم ربنا يرحمه ويرحم اموات المسلمين يارب

بابا الله يرحمه وهو بيحتضر قرا سورة البقره كامله وحده وهو مكنش حافظها وقعد يدعى ادعيه جميله وكلنا قعدنا نأمن وراه وخلى الكل يعيط من جمال صوت وكتر شهاده اللى بيقى يقولها الله يرحمه واللهم ارزقنا حسن الخاتمه

جدي رحمة الله عليه.. مات يوم الجمعة أول يوم رمضان وكان صائماً.. وكان بيستعد هايخطب الجمعة.. أذن المؤذن.. وردد الأذان إلى قوله أشهد أن لا إله إلا الله.. أشهد أن محمد رسول الله.... وخرجت روحه لبارئها..

خالتو الله يرحمها كانت بتصلي الظهر ماتت وهي ساجدة وعمتو الله يرحمها ماتت وهي بتتوضأ للفجر ربنا يحسّن خاتمتنا جميعا بس الفراق هو اللي صعب والموت الفجأه أصعب ربنا يرحم أمواتنا وأموات المسلمين جميعا

الأهم من كده الناس دى كانت بتعمل ايه فى حياتها عشان ربنا يرزقهم بحسن الخاتمة ياريت الى يحكى موقف يقول الشخص كان متعود يعمل ايه دايما في حياته او ايه الخير الكتير الى قعدله ورزقه حسن الخاتمة

عمتي الله يرحمها اتوفت وانا عندي ٨سنين كانت جايه تزورنا هي من بلد جنبنا وباتت عندنا وقامت تصلي الفجر كل مقومها الاقيها ساجده اجي انادي عليها تيجي تنام جنبي متردش انام وأقوم الاقيها بتصلي وبعدين صحيت ماما ولقتها اتوفت الله يرحمها

عمي توفي مبطون كنت بزوره عادب لقيته بيخترف بكلام مش مفهوم وقعد يطبطب عليا وقالي متزعليش ربنا هيعوضك خير وانا دموعي نزلت الله يرحمه كان بيحس بيا كان اطيب حد ف الدنياربنا يجعله من اهل الجنه ويجعل قبره روضه من رياض الجنه

جدى يوم العيد سلم ع العيلة كلها وزار البعيد والقريب واتوضا وقال لجدتى حضرى الاكل ناوى اصوم الايام البيض ودخل فى الصلاة سجد وكانت هى السجدة والله والدى واعمامى واحنا كلنا بندعى فى صلاتنا نموت نفس الموتة ربنا يرزقنا جميعا حسن الخاتمه

اعرف واحد عزيز وغالى عليا اوى كان مش بيفوت صلاه ف المسجد وجه ف يوم هو الامام وبيصلي بالناس الفجر وف الركعه التانيه بيقرأ سوره يس وقع وتوفى ف ساعتها واحنا بنصلي عليه ف المسجد وخلاص هنروح ندفنه قبلنا مسجد تانى ف الطريق دخل بينا نصلي عليا مره تانيه

الاكثر قراءة | هل المنطقة التى تسكن بها البنت تؤثر على مستوى فرصها فى الزواج ؟

ودى كانت جملة من التجارب والاراء للشباب من الجنسين على سؤالنا فى التجربة على موقعكم تجارب كوم انت كمان ممكن تضيف تعليقك على الموضوع فى الاسفل