رد فعلك اي لما جوزك يضربك او يشتمك وما هو عقاب الزوج الذى يضرب زوجته ؟

ما هو عقاب الزوج الذى يضرب زوجته ؟ وهل يجب على الزوجة تحمل ضرب زوجها لها ؟

جمعنا مجموعة كبيرة من الشباب من الجنسين عشان نعرف اجابتهم على سؤال : ما هو عقاب الزوج الذى يضرب زوجته ؟ وهل يجب على الزوجة تحمل ضرب زوجها لها ؟ وتم تصفية اهم الاجابات ووضعها بين يديك لتساعدك على موقع تجارب كوم تم تقسيم الاجابات كل تجربة ورأى فى فقرة اى ان كل فقرة تعبر عن راى شخص واحد فقط

سؤال الموضوع :

رد فعلك اي لما جوزك يضربك او يشتمك !!
وهل تقبلي ده ع نفسك وتقولي اهو ضل راجل ولا ضل حيطه وتستحملي !!

ياريت كل واحد يقول تجربته أو يقولنا وجهه نظره في ما هو عقاب الزوج الذى يضرب زوجته ؟ وهل يجب على الزوجة تحمل ضرب زوجها لها ؟

ضل زفت ولا ضل نيله لا طبعا لو مافيش احترام الله الغني عنه وعن الحيطه بتاعته وانا مش بحترم اي ست تقبل عالنفسها الاهانه

رد فعلى هتطلق منه أو أخلعه


يغور بلا قرف مش ناقصين والله هم

مهما كان غلطها لا يحق له ضربها فامر بمعروف او تسريح باحسان ما احناش الرجاله مقطعين سجاجيد الجامع من الصلاه علشان تهنها بالضرب

مش مصووورة مش مصووورة بس غالباّ هصون العشرة واصلى عليه

واستحمل ليه واحد حلوف تخصصه تعامل حلاليف مش بنی ادمين

الراجل الا جواه نقص الا بيعمل كده

المعاملة بالمثل واللي بيحترم بيحترم نفسه واللي بيهزأ برده بيهزأ نفسه لما هو يمد ايده الناس هتقول ده راجل مفتري بيمد علي علي واحدة ست ده مش راجل اصلا ولما انا بقي اردهاله ساعتها هيقولوا ده راجل مهزأ وانا كمان هقوله انت جبت التهزئ لنفسك وشكلك بقي زبالة ادامي

لا طبعا لو حصلت مش هكمل معاه 🙋 عك

اللي يمد ايده علي واحده ميبقاش راجل اصلا

والله الواحد مايقدرش يحكم على الموقف الا وهو فيه لان ممكن دلوقتى اقول رأى ووقتها وان شاء الله مايجى الوقت ده هقول راى تانى

أقرأ ايضا | هل المنطقة التى تسكن بها البنت تؤثر على مستوى فرصها فى الزواج ؟

ما هو عقاب الزوج الذى يضرب زوجته ؟ وهل يجب على الزوجة تحمل ضرب زوجها لها ؟

الزوار يقرأون الآن | تجربة اختيار شريك الحياة المناسب

ضل مين 😂 هو لو راجل اصلا مش هيمد ايده

مهو كده مش راجل حضرتك


رد فعلى لو ضربنى هضررربووو اكيييد يعنى مش هسكت بس دة لو خناقة

فعلا ضل راجل بس اللى بيمد ايده بقا ده مش راجل

ضل ايه، يوم ما يفكر يهينني مش يمد ايده عليا، حأكون سايباه، هو اصلا لما يفكر يهين مراته مش حيبقى انتفت فيه صفة الرجولة، لا ده حيبقي انتفت فيه صفة الإنسان من الاصل، ده حتى محصلش الحيوانات

الراجل ال يضرب مراته ده ضعيف

هو كدة مايبقاش راجل اصلا

محدش بيضرب دلوقتب

اعتقد رد فعلى هيكون عنيف اوى

هستاذنه واخد بعضي وع بيت بابا وخلاص خلصت بقي 

حيطه تقع ع دماغه قال ضل راجل قال😷👊

ليه المواضيع كلها محبطه وافيله كده :D هو ليه كله ضرب وتعنيف هاه كرهتونا في الجواز وربنا اسالو اسئله حلوه الله يخليكو فككو من السلبيات بقي حافظينها ولمسينها :D عاوزين نعنس بانشكاح

مع الأسف فى أهالى وستات ماشية بمبدأ ضل راجل .. مع إنه إتنزعت منه الرجولة 

ولا أهله عرفوا يربوه ولا يعلموه معنى الرجولة ..

ماينفعش طبعا يتعاش معاه.

ضل الحيطه احسن في الحاله دي ويغور في ستين الف داهيه حتي لو فيه اطفال

لكل فعل رد فعل 

لو الراجل مد ايده ع مراته يبقي هي اللي وصلته لكده 

ولو هي قبلت ده تبقي هتقبل وتتنازل عن حاجات كتيروكمان مش بحترم الراجل اللي ايده سبقي عقله

طب ما نبص للسبب اللي ضربها عشانه ماهو ممكن يكون عمل كدا من غلبه

معتقدتش اني ممكن اوصله لمرحله دي ولا اقبل بكده بس هسامح مره واحده بس ودي تحذير اول واخير :)

رد فعلي ...لو شتيمه مش هرد عليه وهسيبه وامشي لحد مايهدئ وبعد كده اخد حقي 

لو ضرب هدافع عن نفسي وهو الجاني علي روحه😂😂

اما عن ضل الراجل ولا ضل الحيطه.....ده مثل بيحطم من المراءه ومتخلف اصلا ...عشان المراءه اثبتت نجاحها بدون راجل وده واضح جداااا ....اقول ان المراءه هي اللي بتعمل الحيطه وتساند وتحمي نفسها مش الراجل😒

ازاي ضل راجل و هو كدة مش راجل

ضل مين ده ضل كلبي ولا ضل راجل ناقص تربية واحترام لمراته 

بالنسبة للضرب فهوه بنسبة 99% مش هيحصل معايا بس لو حصل هيبقي اخر يوم بينا بس ده طبعا بعد ما اخليه يلعن اليوم اللي عرفني فيه اكيد عند كرامتى لازم يعمل ستوب

بالنسبة للضرب فهوه بنسبة 99% مش هيحصل معايا بس لو حصل هيبقي اخر يوم بينا بس ده طبعا بعد ما اخليه يلعن اليوم اللي عرفني فيه اكيد عند كرامتى لازم يعمل ستوب

ايه السبب فى اللى خلاه يضرب و هل اصلا الفعل ده متكرر أو لا أعتقد انى هرد الضربه و بعد كدة اقعد اتناقش معاه ده لو اول مرة و لكن لو الفعل ده متكرر يبقى اصلا فى حاجه غلط و فى خلل فى العلاقة نفسها

حصلت و مكملتش معاه يوم تاني و لقيت ان ضل الحيطة احسن مليون مرة من راجل عويل و لا ليه اي تلاتين لازمة

الافضل تتكلموا مع بعض وسيبك من الكلام اللى المكتوب لان كل واحد ليه ظروفه الخاصه .. مع احترامى الشديد حاجه زى دى مش للنقاش العام يا إما تتكلموا مع بعض او حد كبير يكلمه لكن الفيسبوك يخرب البيت

ضرب محصلش بس شتيمة حصل مرة واتنين وتلاته وفالاخر انا قمت بالواجب ... بس كان ﻻزم يفوق

اينكان هسكت خالص لاني لهعرف اشتمه ولا اضربه 😂 بس هاخد حقي بالهداوه

لو يقبل ان امه او اخته تضرب من جوزها يبقى مش راجل 

واللي بيمد ايده ضعيف ومابيعرفش يتناقش بالعقل 

ومايبقاش راجل اصلا ^_^ 

فالاحسن الانفصال

ضربه فى ايده لا طبعا مسكتش ليا اهل يجبولى حقى اى كان السبب المفروض انه راجل و حد عاقل نتكلم ويفهمنى اية حصل منى لكن لو بيتعامل بمد الايد ودى طريقته عندى رجاله ترد عليه بنفس طريقته فى اقرب بلاعه بلا قرف

لا طبعا محدش يسكت ع الاهانه ولاد الناس ميتعملش فيهم كده وضل حيطه افضل ع الاقل فيها مكان للشاحن😂😂😂

ربنا يجبلي حقي بقي مش بحب المشاكل وهمشي من قدامه لحد ميهدا خالص بس قبل ميمشي هكسر دراعه واديله روسية تطرحه ارضاااا قال يضرب قال 😂😂😂😂

يا جماعه في ستات بتنكد علي الراجل وردودها مستفزه هو مش هيضربها من فراغ يعني اكيد استفزته بكﻻم خلته يتعصب الراجل مش هيقضيها ملطشه يعني

ياجماعة انا شايف انى الردود من المتزوجين بحرقة والكلام استفزكم بأختصار لو الست شايفة المطلوب منها ومش مأثرة فى حاجة اى هيستدعيه انه يضربها الا اذا كان مختل عقليا او تعبان ولكن الست الشاطرة متخليش الراجل يفكر اصلا بأنها مش مأثرة فى شىء اتجاة حقوقة الزوجية

هى نقص خوفهم خوفهم على اساس كل الرجالة بلطجية روح الله يسمحك على سؤالك الغريب ده

ياجماعة اولا صلوا على النبي اللي بيردوا دول هل كلكم متحوزيين وحصل معاكم الموقف ده ونفذتوا كلامكم ده! في حاجة اسمها فليقل خيرا او ليصمت طبعا انا ضد انه يشتم او يضرب بس ماتعرفوش ايه اللي حصل الرسول قال يأدبها لو استدعى الامر بضرب مايعلمش حاجة كده تهوييش من الاخر لعلها تعرف غلطها لو الغلط كبير اوي ماتقولوش كلام وخلاص ممكن بيوت تتخرب بسببه

يعني من الباب للطق والله لو جوزي عمل كدا وعمره ما عملها هسامحه لأن ممكن يكون تعبان من الشغل

لو ما هو كده مبقاش راجل عشان يبقاله ضل اساسا 

هعمل في زي ما عمل بالظبط ايا كانت نوع الاهانه هردهاله و ابقي اطلق منه

الزوجة ذى الشمسية عشان تعرف قيمتها لازم تكون فوق راسى عشان تحمينى من حرارة الدنيا والحياة

ليه حق يمد ايده ف حالتين لو شافني بخونه مع حد تاني او لو غلط ف اهله غير كده مش هيكون راجل اصلا ✋🏻

افتكر انه مش هيجي يضربنى من غير سبب .. و افتكر برضو انى عمري ما هوصله للمرحله انه يفكر فيها انه يضربنى

بص الضرب عمره ما كان وسيله ولو لجأنا ليه يبقي ضرب غير مبرح ولعلمك انا متجوز بقالي ٨ سنين واكتر عمري ما مديت ايدي علي ام العيال وضد فكره الضرب انما ممكن تحتويها وتربيها برجولتك وشخصيتك

وقت ساعتها يبقا هو اللي جنه علي روحه ب 2 جنيه سم من العطار وحضره الاكل واحطله السم في الاكل وحطله الاكل والبس واتشيك وانزل اخرج واتفسح ولما ارجع ابقا اخد عزاه بقا 

لاء ضل حيطة ايه يكش اللي يضرب مراته تقع عليه الحيطة تبططة 😂😂😂 انا متجوزة وده رأئى في اللي بيضرب مراته ودايما بقول لجوزي ان الضرب ده يتعامل بيه في الشارع مش في البيت ومش هاقول مع البهايم علشان برضو لما بنشوف اي حيوان بيتضرب بيصعب علينا وبنقول علي صاحبة ده مش بني ادم

لو الموضوع متكرر وملوش حل يبقي الانفصال هو الحل بصراحة مش بلاقي اي سبب لتحمل الاهانة لا اولاد ولا ضل راجل ولا نظرة مجتمع ال بتستحمل وضع زي دة بتحاول تعمل نفسها بطلة وشهيدة التضحية وتقول عشان مخربش بيتي وعشان العيال بس ف الحقيقة هيا بتستحمل عشان هيا عيزا تستحمل ومش قادرة تبعد عنه زي المثل ال بيقول القط ميحبش الا خناقه

الرجل الذكي هو اللي يحتوي زوجته و يوصلها انه يخليها تعمل اللي هو عايزه برضاها بمنتهى الذكاء و الاحتواء

الضرب قلة ادب واهانه من شخص لاخر وجزء كبير من وجود القسوه والكراهيه احيانا فبلاش احسن فى اساليب كتير للخناق

انا ضد المثل ده ضل راجل ولا ضل حيطة يعنى الست اللى من غير راجل من غير ضل وبعدين ضرب ايه الضرب للبهايم والحيوانات

بغض النظر ان في ناس كتير ممكن تتقبل دة عشان أسباب كتير مع ان مافيش سبب يخليها تتنازل عن كرامتها لكن انا مش فاهم بيبقي حاسس نفسه راجل كدة يعني !! 

الحياه الزوجيه أرقي واسمي من ان الزو ج يضرب زوجته يجب أن - تقوم علي الاحترام المتبادل أيوه مفيش مانع يكون في غلطات يحب علي كلا الطرفين احتواء الموقف بالتفاهم والحوار

اكيد عمرى ما هقبل بكدة عشان لازم يبقى فى احترام ما بينا و لو فكر يعملها مرة مش هكمل معاه و هيكون نزل من نظرى عشان الراجل اللى بجد عمره ما يمد ايديه على مراته

لا طبعا عمرى مهتقبل لان الرجل الى يمد ايده على ست اصلا مش راجل وانا مايشرغنيش ساعتها ابقى عايشة مع راجل قصاد الناس وفى الحقيقه هو ست

لا طبعآ ،، ده ع افتراض اني سمحت ل ايده تتمد مرة ،، ده مينفعش يتعاشر ولا يتعاش معاه.. هكلم كبيري و كبيره و هطرده برا البيت.. الست ربنا كرمها ف كل الأديان مش عشان جنس آدم يهينها ،، بلا ضل راجل بلا بتاع .. هو ده كدا راجل اصلا 😂

الحقيقة مينفعش تتضرب الا في حاالة واحدة خالفت امر الله ورسوله وتتضرب بعد هجران وضرب خفيف يفهمها انها غلط واللي يظلم ويعتدي فيستني العقاب من ربنا بقا

امممممم انا مش مرتبطة بس لو حصل معايا كدا حاسة أن ممكن اتصدم ولا أعرف أنطق حرف وممكن أقع من الخضة وان شاء الله لو فوقت اقوله النصيب وقف بنا واسيبه  😔😔😔

لا طبعا عمر ما في واحده عندها كرامه هتقبل الاهانه ايا كان نوعها 

وعمر ما في راجل بيتقي الله يتعدي علي زوجته سواء لفظيا او بدنيا

لو ضربني وشتمني يبقا هو ال جابه لنفسه ويقابل بقا 

وكلمة ضل راجل ولا ضل حيطه دي بقت غير معترف بيها اصلا

في ستات عايزه الحرق وفيه ستات تتحط عالجرح يطيب 

وفي رجاله بيسئ لمعني الرجوله من خلال تصرفاته

و هو اما يضربها يبقي راجل؟! ده يبقي ميحصلش الحيطه ع الاقل الحيطه سند انما هو هيبقي ايه لا مؤاخذه عددلي فوايده يعني؟!

بالجزمه القديمه مبقاش في الكلام بتاع ضل راجل ده دلوقتي الست ب100 راجل بتنزل وتشتغل وتربي وتطبخ وتغسل وتعرف تسوق العربيه وليها اجتماعيات اهم من الف راجل بلا هم

الاول ايه هو سبب الضرب اصلها تفرق ماينفع تسال عن ايه رد فعلك لما تضربى قبل ما تحدد سبب الضرب او الشتيمه افرض الست مثلا تستاهل اخطات خطا فيه طلاق وكتر خيره ان ضربها يبقى حدد السبب الاول

ما هو حضرتك كل حاجة وليها عقاب تخيل ان القران جعل عقاب عدم اطاعة الزوجة لزوجها العظة وبعدين الهجر في الضاجع وبعدين الضرب والرسول صلى الله عليه وسلم بين الضرب انه يبقي ضرب خفيف وبينه بالسواك، يعني تخيل بقي لو زوجتك دي عملت حاجة تستاهل الضرب زعقتلك مفيش عقاب ليها غير ضرب تخيل لو اكتشفت انها بتخونك ودخلت عليها لقيتها بتكلم واحد فون دي تعمل معاها ايه ؟؟؟

انا بزعل جدااا جدااا لو بابا زعقلي او ضربني و دي محصلتش بقالها كتير جدا و ممكن افضل زعلانه منه كتير عشان هو معلمنا نحترمه ازاي من غير ضرب او أي أذى لحد و ده ابويا اللي خلفني و رباني و اللي مبحبش حد قده يجي بقا جوزي اللي هو مهما كان مش هيبقي ربع ابويا ولا حبي ليه و يمد ايده عليا و يضربني لا مستحيل اقدر ابص في وشه تاني اصلا ولا احترمه تاني هو مين اصلا عشان يمد ايده عليا و كده يبقي اسمه راجل بقااا

والله انا شايفه اراء من ستات ورجاله غريبه والله ومش ترضى ربنا حتى قال ايه ايوة تنضرب وتتشتم ماهى اكيد هى السبب لانها وصلته لكدة اولا اللى يهين مراته بالشتيمه او الضرب دة مش يعتبر نفسه راجل اصلا ووقتها الحيوان هيكون احسن منه ..ولو على الست الغلطانه يبقى تمام الراجل اللى يغلط ويدايق مراته ولا يزهقها يبقى تشتمه وتضربه كمان لو عصبها ووصلها لكدة ..حسبى الله ونعم الوكيل

الناس هنا الصراحه ماشاء الله عامره البيوت .وعوزه البيوت عمرانه فعلا .طيب احنا سمعنا منها ومسمعناش منه السبب ايه فى الضرب ووصلت الحياه مع بعض لكده بسبب ايه .؟ما يمكن ملطوخه وتستاهل ضرب الناس بس جت على انه ضربها بس .

هو الراجل لما يمد ايده عل ست يبقي راجل اصلاااا .... ملوش حق ولا سبب ولا مبرر والست الي تسكت عل كده تستاهل يداس عليها بالجزمه ده لو روحه فايدها .... قطع ايده وحيطه تقع عل دماغه تفلقها نصين قبل ميفكر يعمل كده

هو مال التعليقات كلها كده مش حاطه فى الاعتبار ان وقت الخناق بيكون الشيطان معاكى ومعاه وممكن يكون اعظم راجل وانتى احسن ست والشيطان خلاه ضربك وانتى بردك الشيطان خلاكى طولتى لسانك وقولتى اللى ما يتقال خلاص شيطان وراح لحاله 

لا طبعا عمرها ما حصلت ولايمكن تحصل علشان لوحصلت مش هينفع نكمل لانه فى الحالة ديه هيبقى مش راااااااجل ولا ينفع حتى يكون ضل الحيطة فى الحالة ديه انضف

اتمني ان كل الاخوات اللي بتتكلم وتقول زوجات وبنات الرسول والدين يكونو بيتعملو مع ازوجهم بنفس الطريقة اللي كانو بيتعملو بيها ازواج الرسول مع رسولنا الكريم قبل ماكل وحدا تحكم من وجهة نظرها بس .... وياريت يسألو اية اللي بيوصل راجل للمرحلة دي واعتقد في حاجة في الدين بتقول واهجرهن في المضاجع واضربهن ودا مش كلامي

فيه حاجه بقه علشان زى ما يكون كل النساء ملائكه وحلوين ومقطقطين وحساسين لان فيه مصر االصنف بتعنا بيحب يظيط ويهيص وخلاص فى مصر عوزين مبداء ايه الى يمشى مبداء انهم يعملوا الى متعمل ويعملوا مصايب وبلاوى سوده وتيجى فى الاخر تقلك الواحده منتضربش طيب فى ستات تستاهل ضرب الناس منجيش احنا بقه نعمم الفكره ونظيط فيها وخلاص وبكده تفتح مليون باب ليها انها تعمل الخطايا السبعه ومش هتتضرب مثلا ولا حد هيكلمها .طيب كل واحده بتقول متضربش ومش عارف ايه هل هيه هتقدر تقدم كل فروض الطاعه المكتوبه عليهااا وتحترم حياتها ولا العرق الاعوج هياكلها على المشاكل والمصايب وخلاص ؟؟ ما انا اطلب حاجه يبقه لازم اكون مقدم قدامها السبب الى ميخليش حد يعمل الحاجه دى وجميعنا ضد الضرب ولاكن يبقه فيه اعتدال وسبب ان بعض الرجاله متضربش نسائهااا .

الراجل اللي بيمد ايده علي مراته بيسقط من نظري جداا وبعتبره مش راجل وعنده عقده نقص وبيطلعها علي مراته دي نظرتي لاي حاله شوفتها حصل معاها كده 

فانا اكيد مش هقبل اعيش مع واحد مش راجل فاول حاجه هي اسيب البيت واطلب الطلاق اكيد

اولا انا ضد المثل بتاع ضل راجل ولا ضل حيطه ثانيا بقي احنا نشوف ايه اللي وصل الموضوع للضرب يعني ايه اللي يخليه يضربها ليه منحلش مشاكلنا بهدوء ووقت مانلاقي الطرف التاني غضبان نجتنبه ونبعد لغايه مايهدأ ومش معني كده اني ببرر الضرب لا انا من وجهه نظري لو لقيت جوزي منفعل وممكن يعمل كده انا هبعد عنه تماما لغايه مايهدأ ونعرف نتكلم انما هو لو غيته الضرب والاهانه يبقي الانفصال اكرم

بس في سؤال بقا... انت سالت واحنا لينا حق نسآل وانت كمان اسآله لنفسك.... ؟!

انت لو عندك اخت بنت هتوافق علي ان جوزها يمد ايده عليها اي ان كان الاسباب... ؟!

لو جاوبت هتعرف اجابه كل بنت هنا ،😊😊

ساعة الغضب الشيطان بيتملك منك ومنها جايز تطلع منها شتيمة...جايز هي كمان تمد ايدها ... .. 

اعظم عمل بيعمله الشيطان انه يفرق بين زوجين متخيلين ؟؟؟؟ يعني معني كدة انه اعظم شرررررر هو هدم بيت واسرة !

بقدرة المستطاع نحابي علي بيتنا ...فمرة اتعصبتوا وراح لاطشك بالقلم خلاص اتقمصي شوية وصالحيه 😊

انما في نوع من الناس اشبه بالبهائم ضرب عمال علي بطال وكانه قابض علي اسير يهودي ده تديله بالجزمة وتسيبيه طبعا ..

غالبا ده لو حصل مبيكونش من فراغ .. اه في رجاله بتستهبل وابسط حاجه انهم يضربوا . 

وفي نوع تاني مبيكونش قدامه حل غير انه يعمل كده .... بالظبط زي الاب اللي بيجيب اخره من بنته او ابنه فبيضربه لمصلحته او علشان يربيه .. 

والضرب الشرع حلله في حالات معينه بس ماعطاش رخصه لكده .

بسم الله ما شاء الله ان شايف ان كل الرجال الى بيعلقو بيحكو ان الضرب ممنوع و حرام و عيب و بطيخ امال النساء إلى ب المستشفيات و المحاكم مضروبة وجايبه دم مين ضاربهم عن جد الله يحفظنا اقوالنا تخالف افعالنا

وماله طبعا يمد ايديه عادي طبعا باعتبار مثلآ ان الست هيا الجاموسة اللي اشتراها بفلوسة .. ده اصلآ مش راجل وتتقطع ايديه قبل ما تتمد بالضرب >_<

الملفت للنظر ان كل الرجاله مش بتضرب وكل الستات مش بتقبل الضرب ....امال اللى بيضربو دول واللى بيطلقو والمهازل اللى بنسمعها فين ؟  

للاسف باسكت 

لانه بعد ما بيهين بيعتذر ويترجانى اسامحه

وكنت باسامح علشان بيتى ميتخربش والانسان اللى حبيته اكمل حياتى معاه

بس للاسف اعتبر سكوتى على اهانتى ضعف منى 

خاصه انه كان عارف انه بيضرب من غير سبب اصلا 

مره علشان التليفزيون عالى 

ومره كان عندى حمى وتعبانه وخليته يشيل ابنه ربع ساعه 

ومره علشان بصتله باستغراب

وكل المرات دى واكتر منها كمان مكنتش بانطق بكلمه استفزه حتى قبل ما يضربنى

وبعد ما كان اول حب فى حياتى 

بقيت باكرهه وباكره اللحظه اللى جمعتنى بيه

هو لو شتم او ضرب مرضاش لأني لازم التمس ليه عذر الله اعلم ايه ال حصل عشان عمل كدا أما لو اتكرر عمري ما اقدر اقعد معاه لحظه

تنقطع ايد اى حد يمد ايده على غير بابا وماما (هم الحمد لله مش بيعملوا كده )مش علشان عاجبنى ضربهم او موافقه لا علشان مش فى ايدى امنعهم او اعرف اردها وبرهم واجب وكده ومايبقاش حرام 

لكن ان جوزى او اى محلوق تانى يفكر بس هازعله ومش هاسكت يعنى مع انى عمرى ماهختار زوج يضربنى وعمره ماهيعملها بامر الله لانه محترم وراجل بجد 

لكن لو عملها لاى سبب فهيبقا فيها طلاقى 

ضل راجل مش محترم نفسه ولا محترمنى مايهمنيش ولاهايضلل على ابدا وقلته احسن

لا طبعا انا موافقش انا بالنسبة ليا ضل الحيطة افضل من انسان الاسم انه راجل يمد ايده عليا وحتي لو في اطفال الاطفال ساعتها هايتربوا احسن تربية بعيد عن انسان لاغي عقله و بيتكلم بأيده بدل ما يعلمهم القيم والاخلاق والاحترام وعدم العنف وازاي يستعملوا عقلهم هايطلعهم عيال خوافة ومش عندهم شخصية ساعتها عشان ولادي هاسيبه مش هاستحمل ولو مافيش اولاد بردو هاسيبه لانه جايبني من بيت انا كنت بتعامل فيه معاملة الاميرات وابويا وامي تعبوا عشاني و المفروض انهم بيجوزوني عشان يطمنوا عليا مع واحد يصوني ويحافظ عليا مش مع انسان يهيني

معتقدش ان الراجل اللي بيتعامل بايده ده شخص واثق في نفسه .. والدي اللي هو والدي و يعمل فيا اللي هو عايزه .. بيتعامل معانا علي ان زعله بس اللي هو زعل هادي زعل مجرد انه ممكن يكون مش بيهزر معايا ده كفيل يقتلني و يخليني اروح اصالحه في ثواني .. 

تفتكر هقدر اتقبل فكرة راجل بيتعامل بايده !! اكيد لا طبعا عملت اي حاجة غلط انا ليا راجل (اللي هو ابويا) يروح بقا يشتكيله يكلمه يجي ياخدني .. بنتك عملت و ابويا اللي يربيني ..

اكيد ده فعل محدش يقبله بس اكيد فى سبب لده لازم افكر فيه .. ومهما كان السبب ده مش مبرر بالنسبالى فبالتالى هعيد نظر ف اختيارى مرة تانية لان كدة واضح انى اخترت غلط اولا وثانيا واضح ان فى حاجة غلط فيا لازم تتغير طالما الامور وصلت بيننا للدرجادى ماهو مش هيضرب من غير سبب الا لو عقله مش موجود .. ولو هنكمل هيبقى فى موقف جامد ولو عدت مرة مش هتعدى التانية ابدا ويبقى كدة مفيش مبرر نكمل واحنا فاقدين احترامنا لبعض ..اما نقطة ضل راجل ولا ضل حيطة متهيألى المفروض ميبقاش ليها مكان ف مجتمعنا حاليا لان دلوقتى ممكن جدا البنت تعيش من غير راجل

لا طبعا مقبلش اني اقلل منه ولا هو يقلل مني ولما توصل لمد ايد وقله كرامه واهانه هتكون ده النهايه اكيد بدون اي تفكير انا مش خارجه من بيت اهلي معززة مكرمة عشان اتهان

لا طبعا ما اقبلش أعيش مع واحد ايده سابقة لسانه الحيطة أحسن من ضل الراجل ده ده لو قولنا عليه راجل

اولا مبداء ضل راجل ولا ضل حيطه ده مبداء متخلف لان ربنا مبيسبش حد وديما معانا

ثانيا مينفعش تقول ع الانسان الى بيرفع ايده ع واحده اى كانت مراته اخته امه ع انه راجل لان خساره ف الكلمه وانا لو لقدر الله حصل معايه كده مش هبقى ع زمته ولا ثانيه واحده

حيطه تقع عليه ميقوم منها ابدا لا طبعا ابقى معززة مكرمه فى بيت اهلى ويجى واحد مجرد اسم راجل فى بطاقه يمد ايده عليا معاش ولا كان حتى لو بدوب فى دبديب امه الا الضرب والشتيمه زعل ماشى عتاب ماشى قمص ماشى لكن صرب وشتيمه على عينى وراسى هتضرب هاتضرب هتشتم هاتتشتم وبعدها هطلق منه كمان

وهو اللي يشتم أو يضرب يبقي راجل أصلا!! علشان يتقال ضل راجل ولا ضل حيطة

الزواج اللي مفهوش احترام يبقي عدمه أفضل ووقتها هيبقي ضل الحيطة ولا ضل ألف من العينة دي

ومفيش راجل هيرضي ان اخته تضرب من زوجها أو والدته تضرب من والده أو بنته من زوجها وأظن هو نفس الراجل اللي المفروض لا يقبل ده علي زوجته

كسر رقبته وعمره قبل ما يفكر يسويها ... لا عاش ولا كان ولا يسمى رجل الي يسمح حق ذاته يطج واحده ... اذا عندها كرامه ماتقبل ولو شنو صار هذا واحد مايدري شي عن الرجوله ... عنجد شي يخزي 👌

لازم يبقي في حدود بين الست والراجل في المساله دي عمر الحياه ماهتبقي حلوه لو مفيش احترام متبادل يعني هيبقي حلو لو شتمني وانا ردتله الشتيمه او ضربني رحت حدفاه بكوبايه مثلا اكيد هيبقي الاحترام بخ ومش هيبقي بينا وبس ده هيبقي في العلن قدام كل الناس ونبقي مهزاه انا شخصيا مابعتبرش الشخص اللي بيضرب ويشتم ده راجل بيبقي شهص ضعيف عنده عقده نفسيه من صغره وبيحاول يعوض النقص بانه يستقوي علي الست

وعشان كدا انا مع جدا ان الست تشتغل -مع الشروط الشرعيه- .. الواحده مش ضامنه حاجه ، وعشان اى سبب زى اهانه من جوزها متقولش اهو ضل راجل لأ دا يغور الراجل وتتهد الحيطه وهى تفوق لنفسها وتبقي بانيه لنفسها قاعده لو وقعت تلاقيها واقعه واقفه على القاعده اللى بانتها لنفسها

لا طبعا مقبلش لانى متربتش على الاهانة والضرب لان اهلى ناس محترمين والراجل المحترم عمره ما يفكر يمد ايده

هو لية احنا بنسمى الرجولة بالضرب والشتيمة والإهانة الرجولة بالإحترام والحب والتربية والتفاهم

عندى حكمه سمعتها من زوجى...اوعى تضربى البنات ..علشان البنت الا تنضرب فى بيت ابوها تنضرب فى بيت زوجها...علشان الضرب بيولد العند.فحتكون عنيده مع زوجها.

اللى يضربنى اضربه ولو اقوى منى اعضه واخربش واشده من شعره واخبطه باى حاجة ايدى تطولها وفى الاخر اقوله معلش 

الاكثر قراءة | ايه اجمل الدعاء اللي ممكن اقوله لما احس اني مش عارفه اقول ايه لربنا ؟

ودى كانت جملة من التجارب والاراء للشباب من الجنسين على سؤالنا فى التجربة على موقعكم تجارب كوم انت كمان ممكن تضيف تعليقك على الموضوع فى الاسفل